Iyavuthwa eyokunciphisa iminyango kahulumeni
SEKUBUNJWE ithimba elihlanganisa iminyango ehlukene kahulumeni ukuze libheke eyokwehliswa kwesibalo seminyango kahulumeni.
Lokhu kulandela isimemezelo esenziwa nguMengameli Cyril Ramaphosa ethula inkulumo ayeyibhekise esizweni ngoFebhuwari nonyaka.
UMnuz David Maynier, weDA ubuze kuRamaphosa ukuthi ngabe seluqalile yini uhlelo lokubuyekeza uhulumeni, kuncishiswe iminyango yakhe.
Kube nesikhalo ngokuthi sikhulu ngokweqile isibalo soNgqongqoshe kwiKhabhinethi yakuleli.
Ephendula umbuzo obubhaliwe uRamaphosa, uthe ithimba lifaka ihhovisi lakhe, uMnyango weziSebenzi zikahulumeni nokuphatha, uMnyango wezokuHlela, uMgcinimafa nowezokuBusa ngokuBambisana neziNdaba zoMdabu.
“IHhovisi likaMengameli yilona elihola uhlelo lokwenza lokhu. Sizoxhumana nazo zonke izinhlaka ngalolu daba ngoba sifuna ukuthi lwenzeke ngesikhathi lapho kuqala khona elinye ihlandla likahulumeni,” kusho impendulo kaRamaphosa.
URamaphosa wakuveza ukuthi bafuna ukuthi ngemuva kokhetho lwangonyaka ozayo kube sekubuyekezwe yonke iminyango kahulumeni.
Waveza lokhu enkulumeni ayethula eziteshini zokusakaza zakwaSABC lapho athi khona inkulu kakhulu iKhabhinethi ngakho idinga ukuthi kubuyekezwe indaba yayo, ngokuthi yehliswe.
Wathi lokhu kuzokwenzeka kodwa ngeke kwenzeke ngaphambi kokhetho ngoba mkhulu umsebenzi okumele wenziwe.
Wakusho lokhu emuva kwesikhalo sokuthi inkulu imali esetshenziswa ongqongqoshe njengoba kudingeka babe nemizi nezimoto ePitoli lapho kukhona amahhovisi eminyango kanjalo naseKapa lapho kunePhalamende.
Kwakhalwa ngokuthi sanyuka kakhulu isibalo seminyango nongqongqoshe ngaphansi kobuholi bukaMnuz Jacob Zuma njengoba uRamaphosa esasebenzisa iKhabhinethi kaZuma oshiyiswe isikhundla kulo nyaka.