Bagasele kwezezempilo ukuhlola isimo
AMALUNGU esiShayamthetho saKwaZulu-Natal ngoLwesibili agasele ezibhedlela nasemtholampilo kahulumeni eyohlola ukuthi kusetshenzwa kanjani ngemuva kokuvela kwezikhalo emphakathini ngosizo lwezempilo oluhlinzekwa kulezi zikhungo.
Amalungu eSishayamthetho abefuna ukuzibonela lokhu okuhlale kushiwo amalungu omphakathi wakuleli mayelana nosizo olukhalisayo olutholakala kulezi zikhungo.
Umphakathi ukhala ngokuthi uhlale ubhekana nezinkinga uma uya ezikhungweni zezempilo zikahulumeni ezifana nokushoda kwemithi nezinsiza.
EKZN kunekhwelo elishaywa iDA e lithi uNgqongqoshe wezeMpilo uDkt Sibongiseni Dhlomo kumele ashenxe esikhundleni ngoba uhlulwa umsebenzi.
Okhulumela iDA ezindabeni zezeMpilo eKZN uDkt Imraan Keeka uhlale esho ethi ngeke aze aphumule uDhlomo esengungqongqoshe wezeMpilo.
“Kusukela angena esikhundleni uDhlomo silokhu siqhubeka nokuba sibi isimo emnyangweni esifundazweni,” kusho uKeeka.
Uthe uDhlomo uhlulekile ukuxazulula nenkinga yokushoda kwemishini elapha isifo somdlavuza nokuholela ekutheni bamfake kwiKhomishini yamaLungelo aBantu.
Nasezweni lonke kunekhwelo elithi uNgqongqoshe wezeMpilo kuleli uDkt Aaron Motsoaledi kumele aphume esikhundleni sakhe.
UMotsoaledi usolwa ngokuwisa uMnyango wezeMpilo.
USomlomo esiShayamthetho eKZN uNksz Lydia Johnson uthe bathathe isinqumo sokuphuma bayohlola ukuthi kusetshenzwa kanjani ezikhungweni zezempilo ngenxa yezikhalo ezivela emphakathini.
“Kuwumsebenzi wethu njenge siShayamthetho ukubheka ukuthi iminyango kahulumeni isebenza kanjani,” kusho uNkk Lydia Johnson.