Awe-ANC awagudluki enkantolo
AMALUNGU anganeme e-ANC KwaZulu-Natal amile ekutheni ngeke asihoxise isinqumo sawo sokumisa ingqungquthela yesifundazwe kuze kube izikhalo zawo ziyalalelwa.
Ngempelasonto iPhini likaNobhala-jikelele we-ANC, uNkk Jessie Duarte nekomiti lakhe elibhekelele ukuxazulula izikhalo, bazamile ukunxenxa lawa malunga ukuba ahoxise icala kodwa anqaba.
UNkk Duarte nethimba lakhe bahlangane namagatsha aseMoses Mabhida eNkantolo eNkulu yaseMgungundlovu ngoLwesihlanu, ngosuku olufanayo lapho amanye amalungu enhlangano ahambisana nobengumengameli wakuleli uMnuz Jacob Zuma kade ehlangene enkundleni yezemidlalo eHarry Gwala ngenhloso yokubamba ingqungquthela nayo emiswe ngenkantolo.
Kulandela isinyathelo sangoJuni 11 sokumisa ingqungquthela yesifundazwe, ezinye izithunywa zayalela uMxhumanisi we-ANC eKZN, uMnuz Sihle Zikalala ukuthi afake amaphepha enkantolo aphikisana nokumiswa kwengqungquthela.
Kukholakala ukuthi ithimba elixazulula izikhalo lizama ukuthi lo mbango wamaqabane aseKZN ukuba ungaxazululwa enkantolo.
Omunye wamalungu e-ANC amise ingqungquthela yesifundazwe, uMnuz Siyabonga Hlongwa, uthe amalungu anganeme atshele uNkk Duarte ukuthi ngeke sihoxiswe isivimbelo uma izikhalo zawo zingaxazululwa. “Sifuna
i-ANC izixazulule lezi zinkinga esikhala ngazo emaphepheni asenkantolo, ukuxazulula lezi zinkinga kungathatha isikhathi esingangenyanga kuya onyakeni ngoba ubuholi obuphezulu kumele bukhulume negatsha ngalinye,” kusho uHlongwa.
Uthe i-ANC eKZN kumele isike iphethini eLimpopo eyakhankasela ukhetho lwango-2014, iholwa ubuholi besikhashana ngemuva kokuhlakazwa kobuholi besifundazwe ngo-2013.
“Ngesikhathi amaqabane aseLimpopo ekhankasela ukhetho ayematasa exazulula izinkinga, babe sebebamba izingqungquthela ngemuva kokulungisa zonke izinkinga,” kusho uHlongwa.
UHlongwa uthe kumele bazimise izingqungquthela, bazame ukwakha amagatsha afaka bonke abantu.
Omunye wabafaka i-ANC enkantolo, uMnuz Bhekithemba Mkhize, uthe uNkk Duarte uthembise ukuthi izikhalo zabo uzozidlulisela ebuholini obuphezulu.
“Asifuni ukuyikhuluma indaba yecala izinkinga zingakalungiswa,” kusho uHlongwa.