Udlondlobale wathenga ifemu yakhe owamatende
UFSENEFEMU ethi yena usomabhizinisi ongumnikazi weSky Tents, eseWestmead eduze kwasePinetown.
UMnuz Isaac Mbatha (27) waKwaMashu, wasungula iSky Tents ngo-2015, emva kokubeka imali ayeyenza ngesikhathi eshayela amatekisi akubo.
Uveze ukuthi uqale ngokuqasha indawo yokusebenza kwathi uma imali ingena wathenga ifemu ukuze akwazi ukukhiqiza amatende, amafriji emicimbi (cold room) namathoyilethe ashawayo nangashawa.
“Ngesikhathi ngisungula iSky Tents ngangibona abantu behlale benza imicimbi elokishini ngase ngibona kungcono ukuthi ngibakhele amatende abazowathenga kimi bese beqashisa ngawo. Ngangingazitsheli ukuthi ngizophumelela kodwa manje ibhizinisi lihamba kahle ngoba nginamagatsha ePolokwane, East London, Kokstad nasePitoli,” kusho uMbatha.
Uthe njengamanje uswele abaxhasi ukuze athenge umshini obiza u-R5.5 million. “Uma ngingathola lowo mshini ngizokwazi ukwakha izihlalo nenye impahla eyenziwa ngoplastiki. Inhloso yami wukudayisa amatende, nezihlalo kwamanye amazwe ase-Afrika. Njengamanje amatende ami adayiswa eNamibia nase-Angola. Ngifuna ukusabalala ngiye kwamanye amazwe kodwa ngiswele abaxhasi,” kusho uMbatha.
Phakathi kwezingqinamba ahlangabezane nazo ubalule eyokuthenga imishini aveze ukuthi imba eqolo neyokuncintisana nezinkampani ezinkulu.
“Umkhakha engikuwona ugcwele ezinye izinhlanga okuthe uma sengivula amagatsha kwezinye izindawo nazo zangilandela. Okubuhlungu wukuthi zona ziyakwazi ukwakha amatende ashibhile, zehlise nentengo yomkhiqizo ukuze zizame ukungikhipha emakethe. Kodwa ngiyabekezela ngiqhubeke nokukhiqiza amatende ahlala isikhathi eside ukuze amakhasimende ami ayalele nabanye abantu ukuthi umkhiqizo wami useqophelweni eliphezulu,” kusho uMbatha.
Ugqugquzele osomabhizinisi abancane ukuthi bangayidli imali yebhizinisi ukuze bakwazi ukulinweba babe namafemu abo.
Uthe ngesikhathi eqala wayenabasebenzi abane okuhlanganisa naye kodwa manje usenabangu-47.
Uphethe ngokuthi abantu abameseke ukuze akwazi ukudala amanye amathuba omsebenzi ikakhulukazi njengoba intsha eningi iduve emakhaya.