AbakwaSAB nezinhlelo zokusiza osomabhizinisi abancane
ZIZODALA amathuba omsebenzi izinhlelo zokusiza osomabhizinisi abancane zakwaSouth African Breweries (SAB), okuyiKickStart Boost neSAB KickStart Ignite.
Ucwaningo lweStatistics South Africa luveza ukuthi oyedwa kwabathathu umuntu omusha okufanele ngabe useyasebenza akakasebenzi okusho ukuthi isibalo sentsha engasebenzi ephakathi kweminyaka engu-15 no-34 simi ku-38.2%.
AbakwaSAB bathe ukusungulwa kwamabhizinisi kuzoqeda izinga eliphezulu lokungasebenzi kwentsha. Esitatimendeni uNkk Phumzile Chifunyise oyi-Enterprise Development Manager kwaSAB and InBev Africa, uthe intsha engu-70 izothola ukuqeqeshwa okunzulu kwezamabhizinisi ukuze iqashe ozakwabo abangasebenzi.“Sikholwa wukuthi yintsha ezothuthukisa umnotho. Sithole ukuthi iningi liqala amabhizinisi ukuze liziphilise. Umncintiswano wethu weSAB KickStart Boost neSAB KickStart Ignite uzoyisiza ukuze amabhizinisi ayo enze inzuzo futhi adale imisebenzi. Sizoqinisekisa ukuthi bazokwazi ukusebenzisana nezinkampani ezinkulu ezifana neSAB and Inbev Africa nezinye,” kusho uNkk Chifunyise.
Uthe ngesikhathi iSAB iqala uhlelo lweSAB KickStart ngo1995 yayifuna ukuthuthukisa osomabhizinisi abancane idale amathuba omsebenzi. “Sifuna ukuqeda umkhuba wokuwa kwamabhizinisi amancane emuva kweminyaka emithathu esebenza.
Osomabhizinisi bazohlonyiswa ngolwazi oluzoqinisekisa ukuthi noma sebephumile ohlelweni lwethu lokubaqeqesha bayazimela futhi baqhubeke nokudala amathuba omsebenzi,” kusho uNkk Chifunyise.
Uthe iSAB KickStart isixhase osomabhizinisi abangaphezu kuka-25 000 yavulela intsha engosomabhizinisi engu-3 500 amathuba okuhweba eNingizimu Afrika, Botswana, Lesotho, Swazini, Tanzania, Zambia naseUganda. Osomabhizinisi abancane bavame ukukhala ngokuthi abanayo indawo yokudayisa imikhiqizo yabo noma izinsiza kanti uNkk Chifunyise uthe lokho bayakulungisa kwiSAB KickStart Boost nakwiSAB KickStart Ignite ngokuxhumanisa osomabhizinisi abancane nezinkampani ezinkulu.
“Asifuni ukuthi osomabhizinisi bathembele kuhulumeni kodwa njengoba umthetho uthi izinkampani ezinkulu kufanele zithenge ezikudingayo kosomabhizinisi abancane senza isiqiniseko sokuthi bayaziwa asebephumelele ukuze abaphumelele bathenge abakudingayo kwabancane. Siyabagqugquzela nokuthi bangene kwezolimo ukuze basidayisele izithako esizidingayo emikhiqizweni yethu,” kusho uNkk Chifunyise.
Abadinga ulwazi ngomncintiswano weSAB KickStart bangangena ku-www. sabentrepreneurship.co.za