Bethule uhlelo lokucija osomabhizinisi abancane
UKUBONA intsha iswele imali yokuqala amabhizinisi kwenza inkampani egxile kubuchwepheshe besimanje i-Orenda yeza nohlelo lokucija osomabhizinisi abancane ukuze baphumelele.
Lolu hlelo lwethulwe ngokusemthethweni esizindeni samabhizinisi esiKwaMashu, iBig Box ngoSuku lweNtsha.
Kulolu hlelo abakwa-Orenda bavule indawo ebizwa nge-Ozone eseBig Box lapho osomabhizinisi abasha bezokwazi ukufika nezinhlelo zabo bese abakwaOrenda bebacija ngamakhono azobasiza ukuthi benze imali.
UNksz Phumelela Bohlela wakwa-Orenda, uthe banezikhala ezingu-20 ezivulelwe osomabhizinisi abancane kodwa abaswele izinsiza.
“E-Orenda sisiza osomabhizinisi abangenazo izinsiza ngoba sifuna bakwazi ukuba neqhaza elibalulekile ekuthuthukiseni umnotho wezwe. Ucwaningo luveza ukuthi u-75% wamabhizinisi amancane uyawa eminyakeni emithathu yokuqala yingakho sifuna ukucija osomabhizinisi ngamakhono azobasiza ukuphumelela nokungenisa imali,” kusho uNksz Bohlela.
Uthe osomabhizinisi abafuna ukuba yingxenye yohlelo lwabo lokucijwa ngamakhono bangaya ku-www.orendaorg.com kungakapheli inyanga (Juni).
Uhlelo lokuqeqesha osomabhizinisi lubiza uR10 000 umuntu emunye.
Usomabhizinisi ozodla umhlanganiso uzothola imiklomelo yenani likaR100 000.
Lolu hlelo luzokwethulwa nakwezinye izindawo eziseNingizimu yeTheku kodwa osomabhizinisi bacelwe ukuthi baye kwi-website yakwaOrenda ukuze bathole yonke imininingwane abayidingayo.