URonaldo ufane nesela bedla iMorocco
mqhudelwano.
URonaldo uzifake eqhulwini lwabashayi bamagoli emaqenjini esizwe base-Europe ngaleli goli eliqhamuke kade kuyikhona, wagxuma walibeka phakathi engamakiwe.
Udlule uFerenc Puskas waseHungary obemi emagolini angu-84 awashaya emidlalweni engu-89. URonaldo usenemidlalo engu-152 eqenjini lesizwe.
Igoli alishayile limbeka kulabo abangase bathole iGolden Boot kulo mqhudelwano. Useqobele amane emidlalweni emibili. Washaya amathathu bebambana ngo 3-3 neSpain ngempelasonto edlule.
IPortugal ibize emdlalweni inephuzu kanti iMorocco ibingakaqoqi lutho ngemuva kokunqontshwa yi-Iran ngemizuzu yokugcina emdlalweni wokuqala.
Ngemuva kokuthi uCR7 evule inkundla ngomzuzu wesine, iqembu lase-Afrika alizange lizibeke phansi. Yilona ebelibonana kangcono lakha amathuba kodwa ekugcineni lehluleka wukuwasebenzisa.
Ngesikhathi kuqhubeka umdlalo bekulokhu kubukeka sengathi iMorocco kuzoyiphinda okwayenza emdlalweni we-Iran, ukulawula umdlalo kodwa igcine ingatholanga amaphuzu.
Kukhulu okubhekwe kuRonaldo nezakhe kwiNdebe yoMhlaba yalo nyaka ngemuva kokuphuma kumaqoqo eBrazil ngo-2014.
IPortugal engompetha baseEurope yakhishwa isibalo samagoli kwazise yayibambene ngamaphuzu amane ne-United States of America. Kuyimanje yize uRonaldo ewaqhulula phambili, nasemuva isidedele amathathu.
Emdlalweni olandelayo izodlala ne-Iran kuthi iMorocco itholane neSpain. Yomibili imidlalo ingoMsombuluko ngesikhathi esifanayo.