Uthembisa ibuya elinamandla uYorke
INKAKHA yeManchester United, uDwight Yorke, ikholwa wukuthi isazobuya imangaze iningi emazweni ahlonishwayo emhlabeni yize iyiqale ngebatha eyeNdebe yoMhlaba ka-2018 eqhubekayo eRussia.
UYorke waseTrinidad and Tobago, uyibambe kumaRed Devils kusukela ngo-1998 kuya ku-2002. Ubeseqenjini eliwine indebe ye-UEFA Champions League lihlula iBayern Munich ngemizuzu yokugcina ngo1999, ngaphansi kukaSir Alex Fegurson osewathatha umhlalaphansi. UYorke udlale kwiNdebe yoMhlaba nezwe lakhe ngo-2006 eGermany. Uthe ukholwa wukuthi izingqungqulu zebhola lomhlaba, okukhona kuzona iBrazil, Argentina neGermany zizovuka zizithathe emuva kokuhluleka ukuwina imidlalo yokuqala eRussia.
“Lena yiNdebe yoMhlaba, okunzima ukuqagula imiphumela yemidlalo. I-Argentina ne-Iceland bengingazange ngiwucabange umphumela wakhona. Benginakho ukuthi iMexico izophuma nokuthize kwiGermany kodwa yagcina ithole womathathu amaphuzu. Lokho kumangaze iningi kwazise iGermany iyona evikela indebe. Namanye amaqembu athwale kanzima. IBrazil ayiqalanga ngendlela ebilindelwe. Lawa amaqembu athwelwe ngeqoma ukuthi azowina iNdebe yoMhlaba kodwa ahlulekile ukuthola amaphuzu amathathu ngosuku lokuqala,” kusho uYorke.
“Kodwa ngiyethemba emidlalweni yesibili la maqembu azobe esazi okufanele akudlalele. Imidlalo yokuvula ifana neyokudlula nje, uzame ukuthola iphuzu. Kodwa eyesibili yilapho okufanele uthole amaphuzu agcwele noma uyagoduka. Yilokho okumnandi ngale midlalo. Asikho isikhathi sokukhalela osekwedlule, kufanele uzithintithe ubheke phambili. Emidlalweni elandelayo kuzoba mnandi ukubona ukuthi la maqembu amakhulu abuya kanjani. Kodwa ngisakholwa wukuthi azobuya ngamandla ngoba anabadlali abaphezulu.”
Ukuqala kabi kwamaqembu amakhulu sekwenze abanye babone lo mqhudelwano njengethuba lokudla umhlanganisa kwalawo athathwa njengamancane emhlabeni. Osokhaya, iRussia izibekisele indawo emzuliswaneni olandelayo emuva kokuhlula i-Egypt ngo 3-1 emdlalweni wayo wesibili. Abadlali abahlonishwayo emhlabeni sebevele baqalile ukukhombisa izinga labo, okukhona kubona uCristiano Ronaldo wePortugal oshaye amagoli amathathu kowokuvula, Romelu Lukaku weBelgium onamabili noHarry Kane we-England oshaye amabili emdlalweni wokuqala.
“Ngihlale ngisho ukuthi abadlali abaphezulu bayohlala bezibonakalisa. Kumanje uRonaldo usephonsele abanye inselelo. Siyakwazi angakwenza. Silindele uMessi ukuthi enze okufanayo. Okwamanje akakakwenzi lokho. Ngokuqhubeka komqhudelwano sibheke abadlali abaphezulu ukuthi bagqame,” kusho uYorke.
QAPHELA: Yonke imidlalo engu-64 yeNdebe yoMhlaba izokhonjiswa bukhoma kwiSupersport.