‘Sizoshintsha isimo sezokuphepha ezinkundleni’
SELIZOGAYA ngomunye umhlathi ezinkampanini eziletha onogada kwiPremier Soccer League (PSL) ukuthi baqaphe udweshu ezinkundleni.
Lokhu kushiwo yizikhulu zePSL, eyengamele ibhola elikhokhelayo eNingizimu Afrika, emhlanganweni wokufundisa amaqembu ngezokuphepha eMoses Mabhida Stadium izolo.
Umhlangano ungeminye iPSL ezoba nayo ezweni lonke. Sebeke baya eGoli naseKapa.
Eyokugaya ngomunye umhlathi ivele ngoLarry Brookstone, osekomidini lezemishwalense nokuphepha kwiPSL.
UBrookstone uthe usuzophela umkhuba wokuqasha onogada bume emgwaqweni bebe bengenazicucu.
“Onogada abaqashwayo manje kuzofanele kube ngababhalisiwe ezinhlanganweni ezifanele zomsebenzi wabo,” kusho uBrookstone.
“Kuzofanele uphele nya lo mkhuba wezinkampani eziqashwa amaqembu ePSL wokuvele zibuthe abantu abawu-200 emgwaqweni bazonikwa itoho. Onogada kumele kube abantu abaqeqeshiwe.”
Yize sizojabulisa abalandeli abaningi isinqumo sePSL sokuqashwa konogada abaqeqeshiwe kodwa kuyayehlisa intokozo ukungaphumi nempendulo eqondile kukaBrookstone uma ebuzwa ukuthi ngabe ngempela umthetho akhuluma ngawo uzoqala nini.
“Asifuni ukukuphoqelela ukuthi konke loku kwenzeke manje ngoba kungasuke kube nokusiphoqa ukuthi side siye phambili sibuye siye emuva.,” kusho uBrookstone.
Okunanele enkulumeni kaBrookstone ngokushiwo nguLuxolo September owengamele ezokuxhumana kwiPSL naye obekhona eMoses Mabhida Stadium.
“Njengoba esho nje uLarry, akufanele uma uqala into bese uthi manje. Kufanele ingeniswe kodwa ngendlela yokuthi bonke abathintekayo bahambisane. Injongo yePSL wukuba nemidlalo ewu-540 engenazihibe isizini nesizini,” kusho uSeptember. “Ukuqikelela ukuthi ezokuphepha zihamba ngendlela, amaqembu asezophoqeleka ukuthumela kwiPSL umbiko oveza izinhlelo zezokuphepha ngaphambi kosuku lomdlalo.”
Nakuba uSeptember engacacisanga ukuthi lokhu kungenxa yezidubedube zabalandeli beChiefs abadinelwa enkundleni iMoses Mabhida bayicekela phanzi ngo-Ephreli bekhishwa yiFree State Stars kwiNedbank Cup, kodwa uthe: “Esinye sezizathu sokuthi sihambele izifunda ngokwehlukana wukuthi senzela ukubhekana nezigameko ezisithinta ngqo, ngokwehlukana kwazo.”
Inkampani yonogada eyayiqaphe eMoses mabhida Stadium ngosuku lwezidubedube zabaladeli beChiefs yi-Aneme Security, onogada bayo abahluleka bancama ukunqanda udweshu nokuletha uzinzo kulesiya simo.