Ibhokisa lifuna ukunqobela i-KZN ibhande
UZIBONA enengcindezi yokuwinela iKwaZulu-Natal ibhande laseNingizimu Afrika umshayisibhakela wasoPhongolo uThulani Gumede ozolwela isicoco ngenyanga ezayo.
UGumede (5-0-0) uzobhekana no-Athenkosi Dumezweni waseEastern Cape empini yebhande le-SA junior bantamweight elingaphethwe muntu ezoba se-East London ngoJulayi 7. Leli bhande lishiywe nguYanga Sigqibo ozolwela ele-World Boxing Council (WBC) International super flyweight noRene Dacquel wasePhilippines empini ezoba ngoJulayi 27.
Kumanje iKwaZulu-Natal inebhande elilodwa laseMzansi okungele SA Cruiserweight eliphethwe nguThabiso “The Rock” Mchunu waseCato Ridge. Eminyakeni embalwa edlule iKZN kade ishaya ngele-SA middleweight ebelikade lisezandleni zikaChristopher Buthelezi waseNquthu nele-SA heavyweight ebelikade liphethwe nguWiseman Dlomo waseThekwini. Nokho bobabili abaphunyukile bengahlulwanga eringini.
“Ngijabule kakhulu ngethuba lokulwela ibhande laseMzansi. Leli yithuba elikhulu kimina futhi bengazi ukuthi lizofika. Ikhona ingcindezi yokuthi ngiwinele iKZN ibhande ngoba esifundazweni asenciphile kakhulu. Ngaphandle kwalokho ngiwumshayisibhakela wokuqala wasoPhongolo ukulwa esigabeni esikhokhelayo ,” kusho uGumede.
I-KZN idonsa kanzima ukuhlela izimpi nokuholela ekutheni amabhokisa afudukele kwezinye izifundazwe. U-Innocent “The Tycoon” Mantengu ungomunye wabashayisibhakela bakamuva abafudukele eGauteng ngenhloso yokuzitholela amadlelo aluhlaza. UGumede ukleliswe endaweni yesishiyagalombili ezilinganisweni zeBoxing South Africa (BSA). Uveze ukuthi kunzima ukuthola ulwazi ngoDumezweni osemajukujukwini e-Eastern Cape. UDumezweni useqhulwini kwabagaqele ibhande le-SA junior bantamweight. “Akukho engikwaziyo ngaye, asitholi lutho. Kodwa sisebenza kanzima nabaqeqeshi bami ekutheni ngibe sesimeni esihle ngaphambi kwempi. Ngiyazi ukuthi bazolibheka irekhodi lami babone ukuthi anginawo amava.. Kodwa ngizimisele ukwenza konke okusemandleni ukuthi ngibuye nalo ibhande, ngiliwinele iKZN,” kusho uGumede.
Ezimpini eziyisihlanu uGumede azilwilesibhakeleni esikhokhelayo ngo-2015, akakaze alwe engaphezu kwemizuliswano emine.