AwePSL afundiswa ngezokuphepha
UKUVELA phambi kwekomidi lezemidlalo ePhalemende, kuyivuse emaqandeni iPremier Soccer League (PSL), njengoba iqale umkhankaso wokuhambela zonke izifundazwe icobelele ngolwazi amaqembu adlala ngaphansi kwayo ngezokuphepha ezinkundleni.
Ngokusho kwePSL ukungafundiseki kwabalandeli banobhutshuzwayo kungezinye zezimbangela ezenza kube nodlame ezinkundleni eNingizimu Afrika.
Lokhu kugqame bha izolo ngesikhathi iPSL inomhlangano wokucobelelana ngolwazi eMabhida Stadium, eThekwini. Inhloso yalo mhlangano ukuthi amaqembu aqonde kangcono izindlela zokuphepha nemithetho engasiza kwehle udlame ezinkundleni njengoba kuphetha ngokuthi kulimale abantu kudicileleke nezakhiwo.
Ngokusho kwesikhulu esiphezulu kwiPSL, uRonnie Schloss, ukungaphephi ezinkundleni kudala ukuthi abalandeli bangawathengi amathikithi, nokuholela ekutheni ezinkundleni kungagcwali.
“Sifuna ukuthi abantu bazizwe bevikelekile uma besezinkundleni. Sifuna isimo lapho khona umndeni uzokwazi ukuphuma wonke ekhaya uzobuka ibhola, uzithokozise ngaphandle kokwethuka. Kungakho sifuna amaqembu asithumele zonke izimfuno zePSL kusasele izinsuku ngaphambi komdlalo. Lokhu kuzonika isigungu esiphezulu sePSL isikhathi sokuba sicubungulisise ukuthi ngabe ezokuphepha zisesimeni esifanele yini. Uzokhumbula ukuthi izimfuno okufaka phakathi nemibiko yeqembu bekwenziwa ngosuku lo mdlalo,” kusho uSchloss.
I-PSL ibhekene nengwadla njengoba izehlakalo zakamuva ziyembule izinqe ukuthi ayisiqinisile isandla kwezokuphepha. Isehlakalo esenzeke eMoses Mabhida ngoEphreli, ngesikhathi kudlala iFree State Stars neKaizer Chiefs kowandulela amanqamu kwiNedbank Cup, singesinye esishiye imibuzo ngezokuphepha ezinkundleni zakuleli.
Lo mdlalo owanqotshwa yiStars ngo-2-0, waphetha ngezidubedube zodlame, olwaholela ekucekelweni kwempahla, kwaphinde kwalimala nabantu. Umonakalo owenzeka eMabhida ubalelwa ngaphezu kuka-R2 million.
Ngokusho kukaLarry Brookstone osesigungwini esiphezulu kwiPSL, esibhekelele umshwayilense nezokuphepha ezinkundleni zakuleli, sekuyisikhathi sokuba amaqembu akwiPSL aqonde ukuthi yini elindeleke kuwona.
“Sihlangene lapha ngoba sifuna amaqembu azi ukuthi kulindelekeni kuwona. Lapha sikhuluma ngezokuphepha kwalo lonke uhlobo enkundleni. Silande ungcweti kwezokuphepha uPatrick Ronan odume umhlaba wonke ukuba azocija amaqembu ngezokuphepha ezinkundleni. Sizophinde sishiye amaqembu nezinto azozifunda, ukuze akhumbuzeke ukuthi ngabe yini okumele ayilungise futhi ayenze ngaphambi komdlalo, noma umdlalo usuqhubeka kuze kube uyaphela,” kuchaza uBrookstone.
Uphinde abe ngusihlalo weHighlands Park ezodlala kweAbsa Premiership kule sizini ezoqala.