UKomphela usezocija iBloemfontein Celtic
KUQALE phansi ukugxekwa kweKaizer Chiefs izolo kusabalala imibiko ethi obengumqeqeshi wayo, uSteve Komphela, usethole ikhaya elisha kwiBloemfontein Celtic ekubeni wona Amakhosi eshayisa ngezinhliziyo abalandeli bawo ngokungacacisi ngozowacija ngesizini ezayo.
Kushaye izikhathi zasemini izolo uKomphela esephezulu ohlwini lwezindaba ebezisematheni ezinkundleni zokuxhumana.
Isikhulu sesiSiwelele, uMax Tshabalala, olidayisayo iqembu, ukuqinisekisile kweminye imithombo yezindaba zebhola ukuthi sebevumelene ngakho konke noKomphela.
“Uyaliqonda ibhola laseNingizimu Afrika futhi useke wacija iFree State Stars phambilini. Sidinga umuntu ozofukula ukuzethemba eqenjini,” kusho uTshabalala.
UTshabalala ukhalile nokho ngokuthi ekaKomphela iputshuke kwabezindaba bengaqondile. UKomphela kulezi nsuku uhlaziya iNdebe yoMhlaba ka-2018 kwiSABC1.
Uxoshwe kwiChiefs sekusele imidlalo emibili kusongwe isizini ka-2017/2018. Uzovala isikhala sikaVelesin Jelusic waseSerbia kwiCeltic.
UJelusic ufake iCeltic emdlalweni wamanqamu weTelkom Knockout ehlulwe kuwona yiBidvest Wits ngo 1-0 ngoDisemba KwaMashu.
UKomphela ube nebhadi lokuba ngumqeqeshi wokuqala ngqa ukuqeda amasizini amathathu elandelana enganqobi nesisodwa isicoco kwiChiefs eyaziwa ngezicoco ebholeni laseNingizimu Afrika.
Igoda phakathi kukaKomphela neChiefs ligqabuke bekhishwa yiFree State kwi-semi final yeNedbank Cup eMoses Mabhida Stadium, eThekwini, ngo-Ephreli.
Ngemuva kwalowo mdlalo uKomphela wesule isigubhukane esithangamini nabezindaba emuva kokuvuka indlobane kwabalandeli beChiefs becekela phansi inkundla nezinsiza kusebenza zabasakazi.
Uqashwa nje uKomphela kwiSiwelele, kuthe cwaka kuMaKhosi angakasivali isikhala sakhe kuze kube manje. Ngokusho kweChiefs ukumemezela umqeqeshi kwakufanele kwenzeke ngaphambi kukaJuni 15.
Eshiya uKomphela kwiChiefs bekukhonjwa umqeqeshi waseBelgium, uLuc Eymael, onqobise iStars isicoco seNedbank ngemuva kokukhipha Amakhosi.
Nokho kuze kube manje akaqashayiwe. Empeleni emagameni Isolezwe elisanda kuveza ukuthi ahamba phambili kubalwa u-Avram Grant, oke wacija iGhana neChelsea yase-England, noMickey McCarthy odabuka e-United Kingdom.
Liyavela negama likaDoctor Khumalo, ozakhele amazinyo abushelelezi kwiBaroka FC asebenza ngokuthi athi angabuyela egijima kwiChiefs uma imcela.
Isolezwe lithole ukuthi iSiwelele siqale izolo ukulungiselela isizini entsha ka-2018/2019 nokubhekwe uKomphela ageze ngayo igama lakhe.