I-Chiefs kwagaqele uVan Heerden
WESHELWA yiKaizer Chiefs umdlali wasemuva uMarc van Heerden ochithwe yi-Orlando Pirates ngesonto eledlule.
I-Pirates imemezele ukuthi sebuphelile ubudlelwano phakathi kwayo noVan Heerden oyibamba emuva kwesokunxele obelizwa ngendaba ijezi kweZimnyama ngaphansi komqeqeshi uMilutin Sredojevic. Leli phephandaba lihoshe ukuthi Amakhosi axoxa nalo mdlali ngenhloso yokuvala isikhala esivuleke emuva kokuba ekhonjwe indlela uTsepo Masilela engavuselelwanga inkontileka yakhe.
IChiefs ichithe uMasilela nabanye abadlali abebefana nezibukeli ePhefeni okukhona kubona uKeagan Buchanan, William Twala obebolekiswe kwiMaritzburg United, Edmore Chirambandare noSibusiso Khumalo obeyibamba emuva kwesokunxele. Amakhosi kusalindeleke ukuthi amemezele umqeqeshi omusha ozovala isikhala sikaSteve Komphela osezoqeqesha kwiBloemfontein Celtic elaxazwe nguVeselin Jelusic waseSerbia.
Umthombo osondelene noVan Heerden upotshoze ukuthi iChiefs isemaqenjini afuna ukuqinisa ngaye isikimu sawo ngaphambi kokuqala kwesizini ka-2018/2019.
“Mathathu amaqembu afuna uVan Heerden. Kuwona kukhona neKaizer Chiefs. Izingxoxo ziyaqhubeka. Kulindeleke ukuthi uMarc athathe isinqumo kuleli sonto noma ngelizayo. Akufunayo wukudlala ngakho akafuni ukuxhamazela,” kusho umthombo.
UVan Heerden, owazakhela igama eyibamba kuMaZulu, ujoyine iPirates ngoJanuwari nyakenye esuka kwiChippa United ehambisana noJames Okwuosa waseNigeria. Nokho kube lukhuni satshe ukulenza elakhe ijezi emuva kwesokunxele lapho kukhonya khona u-Innocent Maela owayengukaputeni weThanda Royal Zulu.
UMaela ugcine eqokelwe umklomelo we-Absa Premiership Defender of The Season owinwe nguSiyanda Xulu weMaritzburg. UVan Heerden akaphumelanga obala ngezingxoxo zakhe neChiefs.
“Akhona amaqembu engixoxa nawo angifunayo. Ngizosithatha isinqumo maduze nje. Abaningi bazomangala. Okuphambili kimina wukuthi ngingajoyini iqembu engingeke ngidlale kulona. Angifuni kungiphinde lokho,” kusho uVan Heerden.
“KwiPirates ngikwenzile okusemandleni, akukhona ukuthi angizamanga. Bengisebenza kanzima zonke izinsuku kodwa angibanga nayo inhlanhla. IPirates iyiqembu elikhulu, ufunda izinto eziningi. Ngifunde indlela yokuziphatha ehlukile kwazise uhlala usemehlweni abantu sonke isikhathi.”
IChiefs ayiphumeli obala ngabadlali ebafunayo kodwa itshela abezindaba ukuthi mabalinde isimemezelo ezosenza.