Wexwayisa abazalwane ngabefundisi
UFISA ukuxwayisa abazalwane ngabafundisi mbumbulu owesilisa wakwesaKwaMthethwa, eMpangeni kodwa ozinze eGoli othi waqolwa umfundisi uR2 million.
Lo somabhizinisi oneminyaka engu-31, ocele igama lakhe ligodlwe ukuze ezovikeleka, uthe uyokuxoxela amagwababa echobana okwamehlekela egilwa nguMfundisi, eluthwa uR2 million.
Elandisa Isolezwe, lo wesilisa uthe wavakashela ibandla elibizwa ngokuthi
i-Activities ehamba nesinqandamathe sakhe ngo2016.
Lo mfundisi uthe ubemazi ngegama elithi-Amo kodwa isibongo engasazi.
Wafica umfundisi wokufika kuleli egila izimanga, ephrofetha naye wamtshela izindaba zakhe wancama.
“Umfundisi waqala engivakashela ekhaya wangitshela konke ngempilo yami engiphrofethela, ngabona ukuthi uyindoda kaNkulunkulu ngempela. Ngabe sengimthemba, waqala wacela ukuba ngimnikeze uR2 million ukuze ezokwakha ibandla. Waveza isitatimende sakhe sasebhange eveza ukuthi unoR3 million. Nangempela ngavuma, imali ngamfakela kwi-akhawunti yakhe,” kusho lo wesilisa.
Emuva kwesonto emnikeze imali, uthe ubelokhu efika esontweni naye umfundisi ekhona. Emuva kwenyanga emnikeze imali akabange esafika umfundisi ebandleni, kwathiwa uyagula. Necala akakwazanga ukulivula njengoba amaphoyisa athi wazivumela yena ukunikeza umuntu imali.
Le mali engu-R2 million, uthe kwakungeyakhe, kuyifa alishiyelwa abazali.
“Ngangilokhu nginganakile ukuthi umfundisi akasekho. Ngaya lapho ayehlala khona ngangamfica kwathiwa akekho sekuhlala abanye abantu. Ngagcina ngingasayi esontweni ngoba nomfundisi engasatholakali nemali, esehambile naye,” kusho lo wesilisa.
Ngo-Ephreli, lo wesilisa, uthe wayezobheka amatekisi akhe eThekwini ngesikhathi ezwa ngodumo lomfundisi osuka eGoli owenza izimanga.
“Ngesikhathi bemchaza lo mfundisi, ngabona ukuthi uyena lona ohambe nemali yami ngo-2016. Ngaya kuleli sonto nangempela ngazithela phezu kwakhe lo mfundisi, ngabona ukuthi uyena. Ngabiza abanye abafowethu esisebenza nabo ematekisini ukuthi beze esontweni simlinde kuphele isonto bese siya kuyena. Wathuka engibona kodwa wathi akangazi futhi uyafika kuleli,” kusho lo wesilisa.
Uthe umfundisi waziphika kodwa waveza amavideo lapho ayeshumayela khona eveza lo mfundisi.
“Wabe esexolisa ethi, mngani wami ngiyaxolisa ngokuhamba nemali yakho, ngizokubuyisela. Sabe sesithi ngeke simdedele ngaphandle kokunginikeza imali yami. Wacela ukuyoyilanda endlini imali kodwa sangavuma ukuba ahambe yedwa. Samlandela saya endlini wangibuyisela uR500 000,” kusho lo wesilisa. U-R1.5 million wathi usebhange kanti kwaphoqeleka ukuba balale endlini yalo wesilisa belinde afake imali.
“Ngakusasa saya ebhange wafaka kwi-akhawunti yami uR1.5 million. Salinda amahora ukuba izihlobo zakhe zimfakele imali,” kusho lo wesilisa. Sahlala naye izinsuku ezintathu silinde imali ize ingene kwiakhawunti yami.
“Kukho konke lokhu ngifundile ukuthi kukhona abafundisi abadlala ngabazalwane ngegama leNkosi,” kusho lo wesilisa.
Imizamo yokuthola lo mfundisi ayizange iphumelele njengoba kungaziwa ibandla lakhe elisemthethweni, nezinombolo zalo mfundisi zingasasebenzi. Igama lebandla elivezwe ilo somabhizini Isolezwe lihluleke lancama ukulithola.