Uziqhathe nomthetho ezama ukweba usana
UKHALELWE ngamasongo kaSigonyela owesifazane obethi untshontsha ingane esibhedlela saseVryheid.
Umthombo weSolezwe uthe umsolwa uhlangane nomunye wesimame esendleleni eyobheka udadewabo obesanda kubeletha esibhedlela iVryheid District, ngoMsombuluko ngezithuba zantambama.
“Owesifazane ngesikhathi esendleleni eya esibhedlela ngoMsombuluko ntambama uhlangane nomsolwa wambuza ukuthi uyobheka bani ngoba yena uyobheka umuntu wakubo ongaphilile kahle,” kusho umthombo.
Uqhube wathi umsolwa wathi abahambisane ngoba baya esibhedlela esisodwa kwathi uma sebesesibhedlela wahlala naye nodadewabo kwathi sekuzoshaya isikhathi sokuthi izivakashi zigoduke, osolwayo wathi akasayi kobheka ilungu lomndeni wakhe uzosale esehlala nabo.
NgoLwesibili, umsolwa kuthiwa wabuya esehamba yedwa wathi uthunywe umndeni kanina wosana ukuthi akamlande, ephethe nezingubo zokugqokisa ingane. Kuthiwa unina wosana wabona ukuthi kukhona okushaya amanzi watshela umsolwa ukuthi umndeni wakhe ngeke uthumele umuntu ongamazi ukuthi azomlanda, wambuza ukuthi kungani abakubo bengamlandile bona.
Unina wosana kuthiwa wabiza umhlengikazi owabuza umsolwa ukuthi ungubani.
Umthombo uthe umsolwa uveze ukuthi ubezontshontsha ingane kodwa ubethunywe ngomunye ongowokufika kuleli ukuthi azoyintshontsha.
Kuthiwa esikhwameni sikamsolwa kutholwe ikhadi lasemtholampilo elinikwa omama abakhulelwe. Ikhadi belikhombisa ukuthi ubeya emtholampilo njengomuntu okhulelwe. Kubizwe amaphoyisa owesifazane waboshwa.
Okhulumela amaphoyisa KwaZulu-Natal, uColonel Thembeka Mbele, usiqinisekisile lesi sigameko. Uthe owesifazane oneminyaka engu-41 uzame ukweba ingane esibhedlela waboshwa.
Ubekwe icala lokuzama ukweba ingane nokuphula umthetho wokunakekela ingane. Uvele enkantolo yemantshi eVryheid izolo.