‘Imibango yinto ezodlula emva kwezingqungquthela’
UNOBHALA jikelele we-ANC uMnuz Ace Magashule uthe isimo sizoba ngcono uma sekudlule izingqungquthela ngoba uma kuyisikhathi sazo usuke umkhulu umbango.
UMagashule uthe labo abayisa inhlangano enkantolo kumele bazi ukuthi akubona ababaluleke ukwedlula inhlangano.
Ukusho lokhu ekhuluma nabezindaba eGoli izolo wathi amalungu angeneme kumele asebenzise izinhlaka zangaphakathi ngaphambi kokuya ezinkantolo.
“Kujwayelekile ukuthi uma kuyisikhathi sezingqungquthela kube nombango omkhulu. Yinto ezodlula,” kusho uMagashule.
Uthe banohlaka oluxazulula izinkinga oluhambela izifunda nezifundazwe okunezikhalo kuzo.
“EHarry Gwala naseLower South Coast, KwaZulu-Natal, azisekho izikhalo ngemuva kokuba lolu hlaka lulalele lwaxazulula zonke izikhalo.
“Abaya ezinkantolo kumele bazi ukuthi akukhona ngabo kodwa kumele kube inhlangano ehamba phambili. Abaqale basebenzise zonke izinhlaka zangaphakathi ngaphambi kokuphumela ngaphandle baye ezinkantolo,” kusho uMagashule.
Uthe kumanje lolu hlaka iNational Dispute Resolution Committee (NDRC) luyaqhubeka lusebenzisana nesigungu sesikhashana sakulesi sifundazwe ukulungisa izinto amalungu ayisa le nhlangano ezinkantolo akhala ngazo.
Amalungu aseMoses Mabhida ayisa inhlangano enkantolo emisa ingqungquthela eyahlelwa isinyenyela ngeledlule.
Kwenzeka lokhu nje nengqungquthela yesifundazwe yamiswa yinkantolo yaseMgungundlovu amalungu ekhala ngokushiywa ngaphandle.
UMagashule uthe bafuna ingqungquthela yesifundazwe ihlale ngaphambi kokuphela kwenyanga ezayo.
Umemezele nokuthi sekuphakanyiswe uSolwazi Job Mokgoro kwesikaNdunankulu waseNorth West ngemuva kokusula kumaMnuz Supra Mahumapelo ngenyanga edlule.
Uthe ikomiti elibheka ukusebenza kwansuku zonke kwenhlangano likhethe uMokgoro (70) njengomuntu onamava ozokwazi ukubumba zonke izinhlaka kulesi sifundazwe.
Uthe ngo-1994 uMokgoro waba ngumqondisi jikelele wokuqala waseNorth West ebhekele ukuhlanganisa iminxa emithathu kahulumeni kube yisifundazwe esisodwa.
Kusuka ngo-1999 kuya ku-2003 waba nguMqondisi jikelele weSouth African Management Development Institute.
UMagashule uthe isigungu saseNorth West silethe amagama amathathu abakhethe kuwona uNdunankulu.
UMahumapelo uthe bazomeseka uMokgoro okulindeleke ukuthi akhethwe aphinde afungiswe esiShayamthetho namhlanje.
Uthe ziyaqhubeka izingxoxo zokuthi kubekhona oyedwa ozosula esiShayamthetho ukuze kufungiswe uMokgoro wathi kungaba nawuMahumapelo ukuze agxile ezintweni zenhlangano njengoba engusihlalo we-ANC eNorth West.