Isinqumo esiphoqa ingcaca kwawezombusazwe
SAMUKELWE isinqumo seNkantolo yoMthethosisekelo esithi kumele itholakale kalula imininingwane yabaxhasa amaqembu ezepolitiki ngemali.
Le nkantolo ifakazele isinqumo seNkantolo eNkulu yaseWestern Cape esithi kumele le mininingwane ibe sobala emaqenjini nakwabangenela ukhetho ngokuzimela.
UMengameli wamaJaji uMogoeng Mogoeng, unqume ukuthi iPhalamende lichibiyele umthetho iPromotion of Access to Information Act (PAIA) mayelana nokuthi itholakale le mininingwane. Lokhu kumele kwenzeke ezinyangeni ezingu-18.
Inhlangano iMy Vote Counts yayisa lolu daba enkantolo ithi ifuna abavoti bakwazi ukuthola ulwazi ngabaxhasa amaqembu abawesekayo.
Izolo le nhlangano ithe ijabule ngesinqumo, ikholwa wukuthi lokhu kuzothuthukisa isimo sezepolitiki kuleli.
“Lesi sinqumo sizovumela abavoti ukuthi babe nolwazi uma kumele banqume ukuthi bavotele bani okhethweni. Siyajabula ukuthi kuzoba nokuvuleleka, abantu bazi ukuthi amaqembu abo asekwa ngobani ngezimali,” kusho isitatimende seMy Vote Counts.
UNobhala jikelele we-ANC, uMnuz Ace Magashule, uthe bayasamukela isinqumo.
“Inkantolo enkulu ezweni, ayikho enye engaphezulu kwale nkantolo. Siyasamukela lesi sinqumo sale nkantolo ngalolu daba lwamaqembu,” kusho uMagashule.
UMengameli weNFP uNkk Zanele Magwaza-Msibi usamukele lesi sinqumo, wathi abaxhasi yibona abebenquma ukuthi imigomo yeqembu izobheka ngakuphi.
“Uma abavoti sebazi ukuthi ubani oxhasayo kuzoba kubona ukuthi bayalivotela yini lelo qembu. Isinqumo sizokwenza ukuthi amaqembu amancane azuze nawo ngoba abethembele kulabo abawasekayo ngemali,” kusho uKaMagwaza-Msibi.
Okhulumela iPhalamende, uMnuz Moloto Mothapo, uthe umthetho iPAIA ubungayivezi imininingwane yabaxhasa amaqembu.
“Siyasamukela lesi sinqumo. Likhona ibanga eselihanjiwe kulolu daba njengoba kunomthethosivivinywa osakhiwa ngokuxhaswa kwamaqembu.”
UMogoeng uthe kubalulekile ukuthi abezindaba bakwazi ukuthola imininingwane ngabaxhasa amaqembu.
Unqume ukuthi uNgqongqoshe wezoBulungiswa akhokhe izindleko zecala.