Isexwayiso kubabhukudi basemabhishi ngokususwa kwamanethi
NGEKE kubhukudwe emabhishi aseThekwini adumile njengoba kususwe amanethi avimbela oshaka ukuthi beze osebeni lolwandle ukuze kudlule osayidinsi.
UMnuz Mike Anderson-Reade weKZN Sharks Board, uthe ngoLwesibili osayidinsi bathe ukugxila emabhishi aseMargate ngenxa yokuthi bekumakhaza.
Kuthe izolo bafudukela eNyakatho yeKwaZulu-Natal njengoba isimo sezulu sifudumele.
Uthe kubalulekile ukuthi abantu balalele abasiza ababhukudayo emabhishi ngoba uma kuzodlula osayidinsi amanethi ayasuswa ukuze oshaka, amahlengethwa nezinye izilwanyakazana zasolwandle zizohamba ngokukhululeka.
“Amanethi siyawasusa ngoba sisuke singafuni ukuthi oshaka, amahlengethwa nezinye izilwane babhajwe emanethini. Uma esusiwe kubalulekile ukuthi abantu balalele abaqaphe isimo ebhishi ngoba kulula ukuthi oshaka beze ngasosebeni kwazise nabo basuke bejaha osayidinsi,” IKHASI ELIKHOKHELWE kusho u-Anderson-Reade.
Uthe uyakuqonda ukuthi abantu bayakuthanda ukuya olwandle kodwa kubalulekile ukuthi balalele ukuze baphephe ababhukudayo bese nabadoba osayidinsi babadobe kahle.
UMnuz Mandla Nsele oyiNhloko yezokuXhumana esabambile kuMasipala weTheku, ukuqinisekisile ukuthi amabhishi asavaliwe ukuze kudlule osayidinsi.
“Amabhishi azovulwa uma osayidinsi sebedlulile. Ukubhukuda kuzoma kuze kube osayidinsi sebedlulile. Ukudlula kosayidinsi yisikhathi esibalulekile ngoba bayathandwa futhi baheha izivakashi nabadobi,” kusho uNsele esitatimendeni.