Ucwaningo ngesibhono sezimanga sikaZimdollar
MASOLEZWE ngicela ngokuqala nginicele nehlise imimoya ngodaba lwesibhono sikaZimdollar woKhozi FM ngoba ngiphezu kwalo ngiyaluphenya nochwepheshe abangaphansi kwami. Uphenyo lwami selusezingeni eliphezulu kakhulu, okuhle wukuthi zonke izinhlangothi ezithinteka kulolu daba zibambisene nami.
Umnikazi wesibhono okunguZimdollar ukhombisa ukuzithoba ubambisene nami ngoba ufuna ukuqeda ukuqagela okukhona ngalolu daba lwesibhono sakhe. Nalabo asebephenduke inkukhu nempaka okunguZondi noDlamini abangasabhekani ngenxa yokuthi bobabili abazimisele ukudeduka eduze kwesibhono sodumo siyaxoxa nabo.
Okuyisona sizathu esenza uVolos enze ucwaningo ngesibhono sikaZimdollar wukuthi ujwayele ukuzwakala emsakazweni ezincoma ngokuthi insizwa ayidabuli uma seyize yavuma wayicindezela ngesibhono sakhe. Ungakababikho lo msindo kaZondi noDlamini ababanga uZimdollar besizitshela ukuthi le ntokazi yakwaBiyela ishaya amagogogo ngalesi sibhono sayo. Lo msindo wokubangwa kwakhe usuyakhombisa ukuthi usuke engadlali uma ethi unesibhono esibhonoza kamnandi ezinsizweni. Uphenyo lukaVolos luzobuka sonke isimo sesibhono sikaZimdollar okuhlanganisa ubukhulu nobude baso kuhlanganisa nekhono lakhe lokusisebenzisa.
MaSolezwe le ngosi yanamuhla iqondene nalo mfana waseBulwer uBongumusa Mthembu onamagangangozi okuvele asuke ngejubane ashiye abantu ongathi uxhunywe kugesi. OkaVolos njengomfana waseBulwer ubone kufanele axoxisane noBongumusa osephenduke inxusa laseBulwer ngenxa yokunqoba iComrades Marathon izikhathi zilandelana.
Volos: Hhayi Bongumusa sekufanele basiyeke ngendebe yeComrades Marathon ngoba seyihlala eBulwer.
Bongumusa: Impela kunjalo futhi ngibona kusazothatha isikhathi ukuthi umqhele weComrades Marathon uthathwe eBulwer.
Volos: Kunabafundi beSolezwe abafisa ukwazi ukuthi kungabe yiRosari ohlezi uligaxe entanyeni elimfihlo yakho ekwenza ugijime ushiye isithunzi. Lo mbuzo ususwa wukuthi uma usugijima ufake iRosari lakho emlonyeni kusuke sekusho ukuthi usuyowina umjaho.
Bongumusa: Akukho lutho olutheni ngeRosari kodwa ekhaya singamakhatholika sikhule silithandaza, uma ngilifaka emlonyeni ngisuke ngikhuleka ngicela amandla okuwina.
Volos: Kuthini ukuphawula kwakho ngabagijimi ababukela kuwena ngokuthi nabo sebegijima befake amaRosari kodwa bangawini?
Bongumusa: Kunjengoba sengishilo ukuthi iRosari liwumthandazo ongeke wakwazi ukuwinisa umuntu engaziqeqeshile, umuntu ofuna ukuwina umncintiswano kufanele adele ubumnandi aziqeqeshe kakhulu.
Volos: Ungaphawula uthini ngabagijimi beComrades Marathon abayilungisela ngokuthi baphalaze baphinde bachathe?
Bongumusa: Ngingeze ngathi kuhle noma kubi kodwa angiboni kuyisu elihle ukuthi umuntu akhandle umzimba ngezimbiza ebesazogijima ibanga elide.
Volos: Mfoka Mvelase ngicabanga ukuthi usuke wafunda emaphephandabeni ngodaba lukaZimdollar woKhozi FM obangwa yinsizwa yakwaZondi neyakaDlamini.
Bongumusa: Yebo sengike ngalufunda lolo daba lombango kodwa kunzima ukuphawula kabanzi ngalo ngoba abathinteka kulona bakhuluma izinto ezingafani.
Volos: Wena Mthembu kungenzeka ukuthi ulibele ukugijima ugcine ungazizwa kahle izindaba, thina esaziyo sizokutshela ukuthi yonke lempi isuswe yisibhono sikaZimdollar.
Bongumusa: Hhayi Volos ngiqala ukuyizwa ngawe lena yesibhono esiqhatha izinsizwa, umuntu uyafisa ukwazi ukuthi luhloboluni lwesibhono lolu olususa umsindo ongaka.
Volos: Mvelase lindela imiphumela yocwaningo lwami ezoveza ukuthi yisibhono esinjani lesi esidida izinkinsela.