Badikile isikole abasola uthisha ngesibhaxu
SEZIQALE phansi izinkinga esikoleni samabanga aphezulu eMbumbulu esacishe savalwa ngenxa yokungaziphathi kahle kwabafundi, asebekhala ngesibhaxu kuthishanhloko.
Abafundi baseMbambangwe Secondary abafunda u-matric badube amakilasi izolo nangoLwesithathu bekhala ngokuthi abasakwazi ukubekezelela ukushaywa nguthishanhloko, bakhala nangokuthi uyabathuka. Njengoba abafundi abaningi bakamatric bezoqhubeka nokufunda uma kuvalwa izikole namuhla, abaseMbambangwe abacele ukungadalulwa bathe abalubhadi esikoleni. Bathi sekukaningi bekhononda ngokushaywa manje sebenqume ukulusukumela lolu daba. Izolo bathe sebecele ukubonana nothishanhloko bamtshele okokugcina ngezikhalo zabo.
Kuke kwavalwa amehlo ngesimo salesi sikole ngo2014 kukhalwa ngabafundi abangalawuleki. Abanye babesolwa ngokuzihlanganisa namaqembu ezigebengu bese beqhubeka nezimpi zabo esikoleni. Ngo-2015 kwangenelela ikomidi iMbumbulu Education Forum ukulungisa isimo sesikole obesekuhlongozwa ukuthi sivalwe.
USihlalo wekomiti inkosi Nathi Maphumulo, uthe bebengakezwa ngezinkinga zabafundi. Uthe uyadumala uma sebeqala olunye uthuthuva phezu kwemizamo yokulungisa isikole.
“Uma abafundi bekhala ngokuqiniswa kwesandla nangokushaywa kumele baveze ubufakazi. Asihambisani nokuhlukunyezwa kwabafundi kodwa ngeke sikhulume futhi ngento engenabo ubufakazi. Kuyadumaza lokhu ngoba isimo sesikole bese sibuyela kwesijwayelekile nathi sesigculisekile. Kuningi osekushintshile ngoba nohulumeni uthembise ukulekelela ukuze kunyuke nemiphumela ka-matric,” kusho uMaphumulo.
Uthe ungomunye wabanxenxe iMeya yeTheku uNkk Zandile Gumede ukuthi ivakashele kulesi sikole nonyaka. UNkk Gumede ovakashile lesi sikole ngoFebhuwari, wanikela ngezimpahla zesikole wathembisa nokuqinisekisa ukuthi isikole senza kahle. UMaphumulo uthe konke lokhu bekuyimizamo yokuthi abafundi bakhuthazeke, isikole singabuyeli esimeni sakudala.
Uthembise ukuthi bazolulandela udaba nezikhalo zabafundi.
Okhulumela uMnyango wezeMfundo KwaZulu-Natal uMnuz Sihle Mlotshwa, ukuqinisekisile ukuthi lesi ngesinye sezikole esike sahlupha ngezinkinga phambilini.
“Sizocela umbiko kwisekethe ukuze sithole ukuthi sinjani isimo esikoleni. Kudingeka sazi ukuthi yimiphi imizamo eyenziwayo ukuqinisekisa ukuthi ukufunda akuphazamiseki, ikakhulukazi njengoba kuthinteka no-matric,” kusho uMlotshwa.
Mayelana nezinsolo ezibhekiswe kuthishanhloko uthe badinga ubufakazi ukuze baphenye.