I-PSL iphika eyokwenzelela ngezinqumo
IPREMIER Soccer League (PSL) ithi akukho ukwenzelela mayelana nezinqumo ezithathayo uma ijezisa amaqembu asuke ethinteka ezenzweni ezingezinhle zokucekelwa kwempahla ezinkundleni.
Umsindo wokuthi kungani ezinye izinqumo nezijeziso zisheshe zikhishwe kwamanye amaqembu zithathe isikhathi kwamanye, ngenye yezinto ezenza abalandeli bakanobhutshuzwayo bashaye amakhala ngePSL.
Ngesikhathi iPSL inomhlangano namaqembu aKwaZulu-Natal angamalungu ayo, kudingidwa ezokuphepha maphakathi nesonto eMoses Mabhida Stadium, eminye yemibuzo ebuzwe yizintatheli yiwona owokuthi ngezinjani izinqumo ezisheshe zikhishwe, ngezinjani eziphuzayo.
ULuxolo September, okwezokuxhumana kwiPSL, ulucacisile udaba, wagcizilela ukuthi kuningi okubhekwayo ngaphambi kokuthi iPSL ithathe isinqumo.
“Okubalulekile okufanele sikucacise wukuthi uma kunomdlalo bese kusuka izidubedube iqembu eliba nenkinga yilelo elisuke lidlalela ekhaya. Noma ngabe umlandeli osuse uthuthuva siyambona ukuthi ugqoke imibala enjani, ekugcineni yiqembu elisuke lidlalela ekhaya eliba nenkinga.
“Okwesibili udaba lwezinqumo luyehluka. Lokhu kudalwa wukuthi uma sekwenzekile kwalimala abantu nempahla, kuba khona umbiko esiwutholayo. Sibe sesibiza iqembu elithintekayo, silibuze ngokwenzekile. Amanye amaqembu enza kube lula, alivume iphutha bese siqhamuka nesijeziso-ke, udaba lusheshe lugoqwe. Kodwa kuyenzeka amanye amaqembu aphike ukuthi ayathinteka, bese ecela ukuba udaba lulandelelwe enkantolo, nokugcina kuthathe isikhathi. Ekugcineni kusuke kuyilungelo lalo iqembu ukuthatha izinyathelo zomthetho. Kulapho-ke uthola ukuthi abalandeli bayakhala ukuthi kungani abanye kusheshe abanye kuthathe isikhathi,” kusho uSeptember. Olunye udaba olusematheni kulezi nsuku, wudaba lwenkundla yeBlack Leopards, iThohoyandou Stadium, okuthiwa iPSL ibishaya amakhala ngokusetshenziswa kwayo ngesizini ezayo. URonnie Schloss, isikhulu sePSL, uthe udaba lwenkundla selisemaphethelweni. “Sekukhona esesikubonile kuleya nkundla futhi sabona ukuthi okuningi sekwenziwe, ikulungele ukusingatha imidlalo. Nokho sicele ukuthi balungise izindawo zokungena, nezokuphuma ukuze zibe sezingeni elifanele ngoba sibone ukuthi ziwumunxa wenkundla ebalulekile ngasohlangothi lwezokuphepha. Sizophinde sihlangane nezikhulu zeLeopards ngesonto elizayo,” kuchaza uSchloss.