UJosephs uzosebenzisa amava ukunqobela Usuthu izicoco
USHIYE inkontileka yeminyaka emithathu abeyithenjiswe iBidvest Wits, waqoma ukuzodlalela AmaZulu FC, uMoeneeb “Slimkat” Josephs, ngenhloso yokuzofaka umoya wokunqoba kubadlali boSuthu.
UJosephs, oneminyaka yobudala engu-37, usayine oSuthwini emasontweni ambalwa edlule. Imibiko engaqinisekisiwe ithi uJosephs usayiniswe ngoba omunye wonozinti baleli qembu, uBoalefa Pule, uzobuyela eqenjini lakhe iSupersport United kule sizini ezoqala. Lo nozinti odabuka eCape Town, uzobanga ijezi noSiyabonga Mbatha no-Energy Murambadoro.
Echaza uJosephs, uthe okwenze walaxaza iWits ukuthi ubefuna ukuzifaka esikalini sokuthi ngabe uzokwazi yini ukufaka umthambo wokunqoba kubadlali boSuthu abancome ngokuthi bakhombise ubumbano nokulambela ukunqoba ngesizini edlule njengoba beqede endaweni yesishiyagalolunye kwi-log.
“AmaZulu yiqembu elikhulu futhi elinomlando. Sengikubone konke ebholeni futhi nginamava. Imenenja yami ngesikhathi ingitshela ukuthi AmaZulu ayangifuna, ngashiya konke phansi ngoba ngabona ithuba elihle lokufaka ulwazi esenginalo kubadlali abasha futhi abalambele ukunqoba. Inhloso yami enkulu ngifuna ukufaka umoya wokunqoba kubadlali boSuthu.
“Selokhu ngiqale ukuziqeqesha ngoMsombuluko ngibonile ukuthi kunabadlali abahle abasebancane, obabonayo ukuthi balambele ukunqoba. Ngifuna ukubafundisa ukuthi ukuze unqobe izicoco, futhi nakuligi wenze kahle, iziphi izinto okufanele uzenze futhi kanjani,” kuchaza uJosephs obematasa elungisa indawo azohlala kuyona eThekwini izolo.
USlimkat uqale ukudlala kwi-Ajax Cape Town ngesizini ka-1997/1998. Useke wadlala kwi-Orlando Pirates neWits. Udlale amahlandla angu-22 kwiBafana Bafana, njengoba wayengomunye wonozinti abathathu kwiNdebe yoMhlaba ngo-2010. Abanye onozinti kwangu-Itumeleng Khune noShu-Aib Walters.
Ngesizini edlule kwiWits, uJosephs ubelizwa ngendaba ijezi njengoba uDarren Keet bekunguyena obevimba kwezikaGavin Hunt. Udlale imidlalo ewu-10 kuphela ngesizini edlule ka-2017/2018 kwiZitshudeni.
Phakathi kwezindebe azinqobile, ese-Absa Premiership asinqobe kathathu, eseMTN 8 asinqobe kathathu, ezimbili zeTelkom Knockout nesisodwa seNedbank Cup.
“Isifiso sami esikhulu ukunqoba isicoco noSuthu. Lokho kobe kusho ukuthi ngikuzuzile okungisayinise kuleli qembu ngoba kunabadlali kuMaZulu abangakaze banqobe isicoco selokhu bangena ebholeni elikhokhelayo. Sike saxoxa noKhenyeza (Mabhudi), Nomvethe (Siyabonga) noMorton (Michael) kwazise sinamava. Besibhunga ngokuthi kufanele isipiliyoni sethu sisisebenzise ngendlela efanele ukuze kuzosizakala iqembu nabadlali ngoba sifuna kube khona iqembu elikuzuzayo kule sizini ezoqala ka-2018/2019,” kuqhuba uJosephs.
Ukufika kukaSlimkat kuMaZulu, kusho ukuthi uMbatha ovimbe kahle ngesizini edlule kuzofanele akhuphule amasokisi.
“Angafuni (uMbatha) angibuke njengembangi yakhe. Ngibona kungakuhle uma onozinti boSuthu bengazinika isikhathi ngami ngoba bazofunda okuningi kwazise iseyinde indlela bona abasazoyihamba,” kusho uJosephs.