Ayiwudli udizili futhi eyomndeni

YIMPELASONTO, ngihlabe ikhefu emsebenzini, lokho kusho ukuthi njengempohlo kumele ngilayishe izimpahla ziyowasha.

Uma ngihambisa izimpahla ngikhipha yonke into ngisho ezokulala kwazise ngizishintsha njalo ngemuva kwesonto.

Ngithe ngisaqala ukulayisha kwiTiguan Allspace udadewethu wabe esebuza, “uhambisa izimpahla ziyowashwa yini?”

Ngiyavuma naye ukucela ukuletha ezakhe ezigcwele isikhwama. Nomunye naye ucela ukuletha ezakhe.

Isikhala esingaka sizoqhamukaphi? Ngiyazibuza.

Kodwa uma ngiciphiza ibhathini lokuvula ibhuthi kwazise livuleka futhi livaleka ngogesi, ngiyabona ukuthi izihlalo ziyalala.

Lapha ngikhuluma ngezihlalo ezisemuva naphakathi nendawo. Angithi phela le moto sebeyelulile kwaVW bayenza yalayisha abagibeli abayisikhombisa nokuyingakho beyibiza nge-Allspace, okusho ukuthi inesikhala.

I-wheelbase ithe ukuba yinde ngo-110 mm. Ubude bayo sebubonke bunyuke ngo-215 mm bafinyelela ku-4 701 mm.

Isikhala sebhuthi senyuke ngo230 litres kanti uma ulalise izihlalo zangemuva siba ngu-700 litres, uma lokho kungenele njengakimi ulalisa ezaphakathi nendawo sibe ngu-1 775 litres.

Nangempela izikhala zami zangena zonke khaxa.

Le moto ihlukene ngezinhlobo ezintathu, okuyiTrendline, Comfortline neHighline.

Ebesihamba ngayo yi-2.0 TDI 4Motion Comfortline.

IComfortline ifika nesivalo sebhuthi esivulwa ngebhathini, LED headlights with dynamic cornering lights okusho ukuthi akhanyisa kakhulu ngalapho ujikela khona neHill Descend Assist.

Inamandla angu-110 kW 4Motion. Yiyona yodwa ekadizili. Ine torque engu-320 Nm futhi ngebanga lika100km bathi iphuza amalitha angu-5.9 litres futhi ino-gearbox oyi-7 speed DSG.

I-4MOTION yenza ukuthi amandla iwathumele emasondweni lapho edingeka khona.

Lena esihamba ngayo bayifake izinto eziningi njengetowbar evela ngokuciphiza ibhathini, ivuleka ngaphandle kokuthi uciphize ibhathini, ine-Active Info Display, panoramic sunroof, izihlalo zesikhumba, chrome and shine package eyengeza ubuhle, amarimu angu-19 inch falls alloy wheels kanjalo ne-9.2 touchscreen with Discover Pro Satellite Navigation.

Uma ngiqala ngithatha uhambo lwami ngiyabona kunesiminyaminya sezimoto, kunokulokhu ngigxoba amafutha namabhreki, ngiyigaxa kwiAdaptive Cruise Control (ACC).

Lapha phela okwami ukuzijikisela isiteringi kuphela ngoba iyazibambela amabhreki uma kukhona imoto engiyilandelayo noma inyuse ijubane uma nayo ilinyusa noma ingasekho.

Njengoba uhambo lwami luhlanganisa ukuguduza edolobheni kuqala ngaphambi kokuphumela kuthelawayeka, nakhona ngiyayikhetha ukuthi ngifuna ihambe kanjani.

Lokho ngikwenza nge -Active Control elawulwa ngenkinobho phakathi eyenza ukuthi umshayeli akhethe lapho ehamba khona njengasemgwaqweni nasobhuqwini.

Uma uyifake emgwaqweni ikutshela ukuthi khetha ukuhamba kanjani phakathi kukaNormal, Sport, Eco no-Individual.

Engikuqaphelayo ngalolu hambo lwami yindlela ethule ngayo ngaphakathi kanjalo nokuba ntofontofo kwayo.

Ngisho ngiyifaka obhuqwini isaqhubeka nokuba ntofontofo okwenza ukuhamba ngayo ungakunqeni nakancane.

Okufike kube yisibusiso kakhulu yindlela eyonga ngayo udizili ngoba ngemuva kokuhamba amakhilomitha angaphezulu kuka-230, ingitshela ukuthi ngebanga lika-100km, isebenzisa angu-6.2.

Lokhu kungenze ngakwazi ukuhamba amakhilomitha angu-733 ngingayethi futhi isasho nokuthi isengahamba amanye angu-120 ngaphezulu kwazise nethangi likhulu lingu-60 litre.

Nokuyipaka njalo akusiwo umsebenzi kwazise ine-Trailer Assist nePark Assist.

Konke lokhu kuyakukhanyisela ukuthi lena yimoto yomndeni enakho konke okudingayo njengesikhala esanele, ubuhle, ubuchwepheshe besimanje, iyonga kudizili ikakhulukazi njengoba amanani enyuka nje futhi intofontofo emgwaqeni. TIGUAN ALLSPACE 2.0 TDI 110kW 4MOTION DSG COMFORTLINE R571 100

Ifika ne-service plan yeminyaka emithathu noma u-45 000km, ne-warranty yeminyaka emithathu noma u-120 000km. Kumele uyisevise ngemuva kokuhamba u-15 000km.