U-bright awukhanyiswa nanini
SASHO sahlangana singasaqali kwelakho lodumo eliwela umfula ugcwele.
Yingakho ngisho ngokungananazi ukuthi uma usubona thina kusuke sekudingeka ukuthi uyibuyisele eceleni insimb’ yomlungu, ubheke indawo ephephile yokuma bese uvula ama-hazards akho ukuze ungadali ingozi. Siyethemba ukuthi sonke sisaphila saka.
Namhlanje njengenjwayelo sithe asicaphune enye yezincwadi esizithole ekhelini lethu elithi hazardiso@gmail.com. Eyanamuhla incwadi ivela kumfo kaNdosi kanti ifundeka kanje:“Shangase, Ngiyafisa ngolunye usuku uke ukhulume ngamalambu angemuva emotweni. Wake wasiyala uMsweli othi akukhanyiswe wonke amalambu. Uthola ukuthi umuntu ukhanyise lawa enkungu angemuva emotweni noma izulu lilihle licwathile. Uyoxhopheka ke wena omlandelayo uthole ukuthi nomgwaqo awuvumi ukuthi umdlule. Ngiyazibongela Thami Cele
Kuyezwakala Nkom’isengwa ilele. Impendulo eshaya emhloleni ithi njengoba usho nawe ukuthi amalambu abizwa fog lights awenkungu.
Izimoto zesimanje zehlukene kabili uma sikhuluma ngohlobo lwamalambu enkungu ikakhulukazi amalambu eyakhiwe nawo imoto, hhayi lawa esizifakela wona. Kukhona ahambisana nawangaphambili okuthi uma uke wakhanyisa awangaphambili bese kukhanya wona. Lawa abomvu kakhulu ngokugqamile abonakala ukude axhophayo engicabanga ukuthi uNdosi ukhuluma ngawo. Zikhona ezinye eziwahlukanisayo uthole ukuthi akhanyiswa ngokwehlukana amalambu enkungu, lapho-ke uyakwazi ukuzikhethela ukuthi ufuna kukhanye maphi, awangaphambili noma awangemumva.
Kodwa isizathu esenza abakhi bezimoto bafake lolu hlobo lwamalambu akukhona kangako ukuthi wena mnikazi wemoto ubone kangcono phambili noma emuva kodwa esokuthi imoto yakho isheshe ibonakale kwabanye abasebenzisi bomgwaqo esimweni esiluvindi. Khumbula amalambu noma amathoshi, siwakhanyisela izizathu ezimbili ukubona nokubonwa. Kuye kungephule umoya ukucacisa lezi zinto ngoba lokho kwakha isithombe sokuthi mina ngicabanga ukuthi abafundi bale ngosi abayazi le nto, ikakhulukazi labo abanezincwadi zokushayela kanti akunjalo.
Kepha uma usubona izinto ezenziwa abanye abashayeli njengoba uzwa isikhalo sika Magaye, kuyacaca ukuthi kuyadingeka ukuthi sikhumbuzane ukuthi belu amalambu akhanya kakhulu awakhanyiswa noma yinini, ngisho ngabe kusebusuku akusho ukuthi vele ukhanyise yonke into ekhanyayo. Lawa malambu angemumva akhanya kakhulu, akhanyiswa kuphela uma izulu lina kakhulu noma kunenkungu emini noma ebusuku.
Noma ngabe yisebusuku kwesikabhadakazi asikho isidingo sokuwakhanyisa ngoba ayaxhopha kubashayeli abakulandelayo kanti lawa ahlezi ekhanya ayawenza umsebenzi wokuthi ubonakale uma izulu lingaguqubele. Uma engahlukaniseki ukuthi ukhanyise awangaphambili kuphela vele ungawakhanyisi nhlobo amalambu enkungu. Nasezindaweni ezinogesi wasemgwaqweni asikho isidingo sokushaya ngo bright. Ngiyazi ukuthi kuzwakala njengokuvula isikole sokufundisa ukushayela kodwa iqiniso limi kanjalo futhi wonke umshayeli uzongivumela.
Kubalulekile ukucabangela abanye abashayeli nabasebenzisi bomgwaqo ngoba ngephutha elilodwa lokunganaki ungadala inkinga, kulahleke impilo yabantu abangangene. Khuzekani bashayeli, phezani ukuxhopha abanye!
Hhayi-ke siyethemba onamehlo usefundile wabona, sesingawavala awanamuhla ama-hazards sibuyele emgwaqweni sishayele ngokucophelela nokulawulwa yiyo yonke imithetho ebusa ezomgwaqo kuleli zwe ukuze sihlangane sisawuphonsa umbalane.
Uma usafisa siyiqhube le ndaba, ngena ekhasini lethu likaFacebook othi Igedlela lami with Sthembiso Shangase. Yimi owenu, nali ikheli ngezansi hazardiso@gmail.com