USjava uqhakambise amasiko ewina eyeBET
UQHAKAMBISE ukubaluleka kwamasiko nemvelaphi uSjava ngesikhathi amukela indondo yeViewers Choice Best International Act Award kumaBET Awards ngeSonto ebusuku, e-USA.
Kulo mcimbi, oklomelisa abaculi abamnyama base-United States nasemhlabeni wonkana, uSjava uhlabane ngale ndondo ehlula abaculi okubalwa kubo, uNiniola waseNigeria wodumo leculo iMaradonna, uKwesi waseGhana noPrince Waly waseFrance.
Ngesikhathi ethatha le ndodo, uSjava uqale ngokucula ikhorasi leculo elimufake emehlweni omhlaba leBlack Panther Album, eyaphrojuswa nguKendrick Lamar, iSeasons, ayenza nomrepha uMozzy noReason.
“Ngiyabonga kakhulu kuKendrick Lamar ngethuba anginikeza lona, inkampani engiqopha ngaphansi kwayo
i-Ambitiouz Records, iKZN, abantu baseNingizimu Afrika nophrojusa wami uRuff,” kusho uSjava ngesikhathi amukela indondo yakhe.
Lo mculi obedlubhe izivatho ezigqokwa kakhulu kwaShembe, uveze nokuthi uyathemba ukuthi lokhu kuzogquqquzela nabanye kuleli ukuthi bangaphumelela.
“Ukuba lapha nokunqoba le ndondo kuzojabulisa abantu abaningi ekhaya. Baningi abantu abazokhuthala babone ukuthi ungaphumelela empilweni ngokuba uwena,” kuphetha uSjava.
USjava ube esedlulela emakhasini akhe ezokuxhumana lapho ebonge khona abalandeli bakhe, wahlangabezana nenqwaba yemiyalezo yabantu okubalwa kubo nosaziwayo abebemuhalalisela.
Kulabo kubalwa uDJ Maphorisa obhale kuTwitter wathi: “Halala Sjava ngiyaziqhenya ngawe.”
UFikile Mbalula umbongelile naye. Kwabanye osaziwayo abahalalisele, uSjava, kubalwa uCassper, Major League DJs, Natasha Thahane, DJ Tira, Lootlove, Amanda Black, Sizwe Dhlomo nabanye.