Kulindelwe izindodla zemali ngeDurban July
UZONGENISA ngaphezu kukaR260 million emnothweni waKwaZulu-Natal umjaho omkhulukazi wamahhashi, iVodacom Durban July.
Lezi zindaba zidalulwe nguNgqongqoshe wezokuThuthukiswa koMnotho, ezokuVakasha neMvelo KwaZulu-Natal, uMnuz Sihle Zikalala.
Uthe iVodacom Durban July engoJulayi-7 eGreyville Racecourse izoheha abantu abangaphezu kuka-55 000.
“Ngonyaka odlule iVodacom Durban July ingenise uR260 million, silindele ukuthi inyuke le mali kulo nyaka. Izibalo zikhombisa ukuthi izongenisa uR159 million emnothweni weTheku kuphela bese ingenisa uR10 million wentela esikhwameni sikahulumeni. Idala amathuba angu-320 wemisebenzi ngonyaka,” kusho uZikalala.
UMnuz Charles Preece, ophethe iFederated Hospitality Association of Southern Africa (Fedhasa) ezifundazweni ezigudle ulwandle, uthe amahhotela anabantu njengoba kuyisebusika.
“Amahhotela avamise ukugcwala ngempelasonto yeVodacom Durban July. Izivakashi zihlala isikhathi eside ngoba nezikole zivaliwe, silindele ukuthi amahhotela enze kahle, avamise ukugcwala ebusika ngoba abantu beza esifundazweni sethu befuna isimo sezulu esifudumele,” kusho uPreece.
Sekuqalile ukuphithizela kwabasebenzi eGreyville Racecourse njengoba sekubalwa izinsuku ngaphambi kwalo ndumezulu yomcimbi.
Izolo ebesekhona amatende asegxunyekiwe, kwezinye izikhala kusafakwe izikhafula azongena phezu kwawo. Bekukhona abafaka amagenerator amakhulu azosebenza ukuze kungaphazamiseki noma ngabe kuphela ugesi.
Amathikithi okungena atholakala eComputicket ezweni lonke jikelele ngoR220.
Amatende okulindeleke ukuthi abe khona kulo nyaka kubalwa eleAfrotainment ezobe ibophele uTira, AKA, Sjava, Distruction Boyz, Tresor nabanye.
Kukhona ne-Eyadini Village okuzobe kunandisa kuyo abaculi abahlukene okukhona kubo uBabes Wodumo, Lerato Kganyago, Major League nabanye kanti enye yiGagasi FM Red Star Experience okunoProfessor, Shimza, Busiswa, Tipcee, Vusi Nova nabanye.
Amanye amatende ngaweMabala Noise iThe Great Gatsby ne-Amstel Boomtown namanye.