Kushone ‘uNdlunkulu’ owakhwabanisela uSARS
USHONE egubuzelwe ifu elimnyama lamacala “uNdlunkulu”, uNkk Nokulunga MaNtombela Zondi (osesithombeni), oshonele esibhedlela emuva kokuxinwa ukugula.
UMaNtombela (61), ubegane inkosi uNsikayezwe Zondi KwaMpumuza eMgungundlovu. Inkosi uZondi itshele Isolezwe ukuthi kuyansonsotha njengoba uNdlukulu wakhe edlule ekuseni khona izolo.
“Kunzima kakhulu njengoba le nto yenzeke namhlanje (izolo) kodwa impela kuyiqiniso udlulile umama. Ushonele esibhedlela emva kokugula. Ubenesifo somdlavuza webele. Uthole ezinyangeni eziyisithupha ezidlule ukuthi unalesi sifo,” kusho inkosi uZondi. Ngokwenkantolo, uMaNtombela ubengaphandle ngebheyili ka-R200 000 ecaleni lokukhwabanisa u-R11 million we-South African Revenue Services (SARS). UNdlunkulu wagwetshwa kulo nyaka iminyaka emihlanu ebhadla ejele. Kuthe emva kwesinqumo senkantolo wavele waquleka, waphuthunyiswa esibhedlela sakhona ejele. Wabe esefaka isicelo sebheyili njengoba ubevele esegula. Eminye yemibandela yebheyili yakhe eyabekwa inkantolo ukuba ahlale, ezigqume endlini ngaphandle uma eya esontweni noma emicimbini yesonto noma ukuyothola usizo lwezempilo.
Kwenzeka lokhu nje, uMaNtombela, ubedlulise isinqumo secala ukuba sibuyekezwe isigwebo sakhe.
Bekusalindelwe isinqumo ngokubuyekezwa kwecala. Uma bekungaphumeleleki ubezodingeka azinikele enkantolo ukuze ayoqala isigwebo sakhe.
UMaNtombela ubengumqondisi wenkampani, oThatheni Women’s Construction.
Ngokwenkantolo, walivuma icala lokukhwabanisa uSARS uR11 million kusukela ngo-2007 no-2011.
Lokhu kuthiwa wayekwenza ngokufaka izinombolo zeVAT ezingelona iqiniso, uma kumele afake izimali ezingenayo neziphumayo enkampanini yakhe.
Leli cala kuthiwa lidonse iminyaka eyisikhombisa. Ubelokhu ehamba icala njengoba laze lamgojela.
Ngaphandle kwalokho lo Ndlunkulu ube ngomunye bokuqala besifazane abachume kwibhizinisi lokwakha njengoba bekusagcwele amadoda.
UMaNtombela uyindodakazi yesikhulu se-IFP uMnuz Thandabantu David “Gandaganga ongenastering” Ntombela.
Wazalalwa khona eMgungundlovu (eSkobho) wabe esegana inkosi. Ube unkosikazi wesithathu elama uNdlunkulu uMaMbhele, noMaZingelwayo.
Babusiswe ngabantwana abane nenkosi, oyedwa usadlula. Izolo Isolezwe lithole ukuthi besisikhulu isililo emzini wenkosi njengoba umphakathi ubusuqalile ukufika.