Isidumo kushiswa ibhasi inabagibeli
KUSUKE isidumo kukhishwa abagibeli ebhasini likamasipala elingqongqiswe izolo eRidgeview, eThekwini, umphakathi ukhala ngentuthuko nezindlu.
Isolezwe lithole ukuthi ibhasi likamasipala belithwele abantu libahambisa ezindaweni ezehlukene ngesikhathi limiswa umphakathi obungazwile.
Kuthiwa abagibeli baphume bekhala ubumayemaye bengazi noma bazohlaselwa yini. Umshayeli webhasi naye kuthiwa ukhishiwe wathi nyawo zami ngibelethe.
Umphakathi kuthiwa ubukhala ngokuthi intuthuko uyizwa ngendaba njengoba ingakaze ifike endaweni yawo.
Okunye obekubakhalisa kakhulu wukuthi badilizelwe imijondolo yabo manje bafuna izindlu ngodli ngoba balala emnyango.
Okhulumela amaphoyisa KwaZulu-Natal uLt Colonel Thulani Zwane uthe basaphenya ngesigameko.
“Ekuseni ngo 6 namhlanje (izolo) amaphoyisa aseCato Manor abizwe amaphoyisa umphakathi waseRidgeview unodlame uvale umgwaqo ngamathayi avuthayo nangamatshe ukhala ngentuthuko. Ngokophenyo umphakathi udubule amaphoyisa washisa ibhasi likamasipala. Akekho olimele. Kuvulwe icala lokuzama ukubulala, elokucekela impahla nelodlame. Uphenyo lwamaphoyisa lusaqhubeka,” kusho uZwane.
Okhulumela uMasipala weTheku obambe njengenhloko yezokuxhumana, uMnuz Mandla Nsele, uthe badumele ngokushiswa kwebhasi likamasipala.
“Ngempelasonto uphiko lweLand Invasion lubhidlize izindlu (imijondolo) eyakhiwe ngaphandle kwemvume eRidgeview. Namhlanje (izolo) ekuseni amaphoyisa athole umbiko wokuthi umphakathi usushise imoto (ibhasi) kamasipala. Siyasigxeka kakhulu isenzo sokucekela phansi impahla kamasipala uma kunemibhikisho,” kusho uNsele.
Amaphoyisa athe isimo asiqaphile emuva kwalo mbhikisho.
Ngokombiko wamaphoyisa ukuhamba kwezimoto kuphazamisekile ekuseni izolo kodwa zabuye zahamba kahle sekususwe ibhasi.