Kubhubhe abahlanu engozini yetekisi nemoto
ISHIYE kukhalwa ingozi yePolo netekisi idlula nabangani abahlanu eNtumeni, eShowe.
Lesi sibhicongo ekushone kuso abesilisa abahlanu senzeke ebusuku ngeSonto.
Ngokuthola kweSolezwe, itekisi ithathwe indodana yomnikazi wetekisi ngaphandle kokumazisa yashaya yachitha nomngani wayo ongumakhelwane, bahambisa abantu edolobheni eShowe.
Le tekisi itholane phezulu nePolo nayo kuhamba abangani abasebenza ndawonye. Itekisi ibisiyekhaya eVuma, iPolo liya eMpangeni izodlula edolobheni eShowe. Abebehamba ngePolo bashone bonke futhi bengabesilisa. Etekisini kushone umngani kamshayeli, umshayeli wasinda kodwa usesimeni esibucayi.
Ngokuthola kweSolezwe laba abane bebevela emcimbini womunye uzakwabo obuseNtumeni kanti kuvele ukuthi bebesebenza emayini eseS’khaleni.
Okhulumela amaphoyisa KwaZulu-Natal, uLt Colonel Thulani Zwane, uthe kuvulwe amacala amahlanu okubulala ngokungenhloso.
“Kushone abahlanu engozini eyenzeke eNtumeni eShowe ngo-7 ebusuku. Kushayisene izimoto ezimbili itekisi nencane. Bashone ujuqu endaweni yesigameko, oyedwa waphuthunyiswa esibhedlela. Amaphoyisa aseShowe aphenya icala lokubulala ngokungenhloso, akekho osaboshiwe,” kusho uZwane.
Izolo laba abashonile bebengakaqinisekiswa ukuthi bangobani, bekusalindeleke imindeni yabo.
Ngakho ukuphawula kwemindeni yabashonile ayizange iphumelele njengoba kusalindeleke beqinisekise ukuthi impela laba abashonile izihlobo zabo.