‘Sizovotelwa ngemisebenzi yethu’
UMENGAMELI we-ANC nezwe uMnuz Cyril Ramaphosa usexwayise inhlangano ukuthi ingathembeli ekutheni abantu bazoyivotela ngoba yabakhulula kodwa bazoyivotela ngemisebenzi eyenzile, nesazoyenza.
URamaphosa ukusho lokhu evula umhlangano wokubonisana ngokuzoba semqulwini wokukhankasela ukhetho ngonyaka ozayo i-manifesto e-Irene, ePitoli, izolo.
Uthe bazokhankasa ngezinto inhlangano esizenzele umphakathi. “I-manifesto kumele ikhulume ngekusasa, ikhulume ngezinkinga ezibhekene nabantu. Kumele icacise ukuthi izwe lizobe likuphi eminyakeni emihlanu ezayo. Akumele ikhulume ngezinto ezingekho ezinhliziyweni zabantu.”
I-ANC iya okhethweni lwangonyaka ozayo ibhekene nobunzima bokwehlelwa wukwesekwa emphakathini.
URamaphosa uthe bazothola umbono wezifundiswa nongoti bemikhakha ehlukene ngezinto okumele zibe khona kwimanifesto.
Uthe kumele ifane nomqulu wamalungelo iFreedom Charter, eyadwetshwa ngoJuni 26, 1955.
“Imanifesto kumele ifane neFreedom Charter. Kumele nithathe yonke imibono, ningasabi ukukhuluma ngezinto nizibize njengoba zinjalo.”
Uthe banerekhodi lokubumba izwe nazo zonke izinhlanga okuyinto amanye amaqembu angenayo. “Umqulu kumele ube nomyalezo ozokhuluma ngezwi elilodwa. Sizoya emagatsheni nazo zonke izinhlaka zenhlangano ukuze ixoxwe eyomqulu. Sizobiza imihlangano yomphakathi ukuze sizwe imibono yabantu ukuthi yikuphi abakufuna kakhulu.”
Ukhetho lwangonyaka ozayo luzoba ngolunye oluzobangwa kakhulu.
Inhloko yezemigomo kwiANC, uMnuz Jeff Radebe, ithe umqulu uzofaka izinto eziningi okubhungwa ngazo, okubalwa kuzo ezemfundo, ezempilo, ezokuphepha, umhlaba nokunye.
Ohola imikhankaso yenhlangano, uMnuz Fikile Mbalula, uthe bazoya kuzo zonke izinhlaka beyokhuluma ngemanifesto.