Uqophe umlando Umsamo ngohlelo kwithelevishini
INHLANGANO, Umsamo Institute, iqophe umlando ngoMsombuluko owedlule ngenkathi yethula uhlelo lwayo lokuqala olubizwa ngoMsamo Encounters kwithelevishini ngaphansi kwesiteshi I AfroWorldView ekuChannel 405. Lolu hlelo luzokuba njalo ngoMsombuluko phakathi kuka-9 no-10 ebusuku, bese luphindwa ngoMgqibelo ngo8.30 ekuseni, nangeSonto ngo4.30 ntambama.
Lokhu kungumlando ngoba kusukeka ngesikhathi sobandlululo imisakazo nomabonakude abazange babe nohlelo olubekelwe ukuthuthukisa izinto zabantu abamnyama base-Afrika, amasiko abo nezinqubo zasemandulo. Namhlanje siseminyakeni engu-24 yenkululeko kodwa akukho nesisodwa isiteshi somsakazo nesethelevishini esisathe asithathe igxathu lokwenza lokhu. Kungokokuqala ngqa. Imisakazo nethelevishini noma bezenza, bazinikeza isikhashana esincane baphinde futhi zishayelwe abantu abangenalo uhlonze ngezinto zesintu. Kudingidwa kukhiwe phezulu, kungajulwa. Lokhu okwenza kufane nokuthi abenze lutho.
Lolu hlelo luhlelwa uSiyabonga Mkhize oyindonana yami, lwethulwe yimina uqobo. Inhloso yalolu hlelo akukhona ukushumayela ngokukhonza amathongo nenkolo nokwelapha kwesintu kodwa ukubheka ulwazi lwasemandulo nobuhlakani bakhona ukuthi basalaphi nokuthi esikubona namahlanje ngakube kusha yini noma kwakukade kukhona bengakafiki abamhlophe. Umsamo ngokuxhumana, nokuxhumekeka lapho sivela khona izinkaba zethu nolwazi lomfume wamafutha esakulahla thina ngenxa yalokhu esathi uma sikuthatha sathi impucuko iyona ngqikithi yalolu hlelo. Luzongena kuyona yonke imikhakha kusukela emakhaya, ezikoleni emabhizinisini, kuze kuyoshaya kuzifundiswa zasemanyuvesi. Kuzolandwa ongoti emikhakheni eyehlukile kuxoxwe nabo, kanti kokunye kuvakashelwe izindawo lapho kade kwenzeka khona izinto ezithize ezithinta isintu, okungaba imicimbi yesintu kuzona zonke izinhlanga ezikhona ezweni lase Ningizimu Afrika.
Kuningi okwehlela abantu bangazi ukuthi bazokwenzenjani abanye bazi kodwa bazizibe izinto okufanele ngabe bayazenza. Uma ubheka emakhaya esiphila kuwona kunezinkinga esizaziyo kodwa sizishalazele, kanti bakhona abangakhuluma ngokufana nokukuphethe bese kwenza nawe ube nesibindi sokuphumela obala. Sizokuxoxa nabantu abazophumela obala ngezindaba zabo, abangesabi ngazo ngenhloso yokuthi kwelapheke abanye. Sinezikhulu eziphezulu ezinkampanini ezinkulu nakuhulumeni othi uma ubukela kumabonakude okwenzeka kulo muntu bese utshelwa ukuthi inkinga yalo muntu ilele ekwenzeni ukuthi nokuthi. Omunye utshelwe ukuthi uyakwazi kodwa uyakushalazela. Asizibuze kuthi kungani izikhulu zakithi ezisezikhundleni zishayeka imihla namalanga, osomabhizinisi nabamathenda abawa imihla namalanga, kukhona lokhu abakushalazelayo bebe bekwazi. Ohlelweni esavula ngalo ngoMsombulo wokuqala ngangenisa ngomama uThoko MkhwanaziXaluva, ongusihlalokazi weKhomishane yezokuBhekela ezeNkolo, amaSiko neziLimi kuleli, kwase kulandela insizwa ebibamba izimoto ezithwala imali yaseMsinga, yadonsa iminyaka engu15. Uma ilanda ithi uma ungakaboshwa usuke ungakamazi uMvelinqangi nethongo.
Wayetshelwa ukuthi le mali abayifuni abadala, kufika ikhehla kuyena lithi akayeke le nto ayenzayo ngoba le mali inegazi, kodwa ngokungalaleli waqhubeka. Uthe lapho esegwetshwa, ubusuku bokuqala esejele, lafika ikhehla lathi, “Uzoyidonsa yonke le minyaka ukuze uphume lapha sewazi ukuthi ukungalaleli kuyini.” Nebala kwabanjalo. Uthi abekho abantu abanezibobanakaliso njengeziboshwa. Njalo uma bevuka baxoxelana amaphupho nezibonakaliso zabo. Uyedwa ophuphela omunye, nomunye achazele omunye. Uthi laphaya ngaphakathi kukhona izangoma nabefundisi abangazi ukuthi banalezo ziphiwo kuze kube umuntu ungena ejele kube imanxa ekuboniswa lokho. Kukhona laphaya ngaphakathi abangene ngezizathu zabazali.
Uhlelo luzobheka mikhakha yonke, ngokuthi sixoxelwe asebeyihambile indlela. Kukhona labo abanezindaba abangazi ukuthi bangebelapha kanjani abanye. Injongo enkulu-ke lena yalolu hlelo ilapho sizo funa izikhulumi zonke ezizomenywa zihlube udlubu okhasini. Abaphumelela, maqedane babonge uNkulunkulu bebe benamagundane phansi kwemibhede namadoda amafushane kodwa baqhakambise okungekhona. NANSI INDABA Sikhuluma ngengaphesheya kwengcwaba, abahambile ababuyi ukusixoxela ngempilo yakhona.
Bhedlindaba. (033 5691317/ 0797471911/ 0728972001.