Kuvela okwenze uJali waqoka ukuya kwiSundowns
UBENGAYIZWA eyokuya kwiKaizer Chiefs engenaye umqeqeshi u-Andile “Gattuso” Jali ogcine ngokusayina kwiMamelodi Sundowns.
Ngokusho kwemenenja yalo mdlali, uMike Makaab wePro Sport International, imali ebibekwe iChiefs neMamelodi Sundowns ibifana kodwa uJali uthe uncamela ukuyodlalela amaBrazilians kunokusayina neqembu “elisahlanganisa” elingenamqeqeshi.
Ngemuva kwezinyanga uJali kungacaci ukuthi uzosayina kuphi, ugcine esayine neSundowns inkontileka yeminyaka emihlanu ngasekuqaleni kwale nyanga. Ubebangwa yiChiefs, Pirates neSundowns. Nokho kwathi sekuhambe isikhashana, iPirates yakhala ngaphansi kwasala iChiefs namaBrazilians.
“Udaba lukaJali belunzima kakhulu. Nokho ngenxa yokuthi nginemigomo engiyilandelayo engashintshi noma ngabe kunjani ngiqhubekile nokulandela yona. Ngiyaye ngibukisise kahle ukuthi yini ebekwa yiqembu etafuleni. Ngiphinde ngibuke ikusasa lomdlali ukuthi ngabe iqembu liyamcabangela yini noma iqembu lizibeka lona phambili. Uzokhumbula ukuthi uJali uneminyaka ewu-28 ngakho nemali kufanele ibe yinhle. Siyazi sonke ukuthi umsebenzi wokuba umdlali yinto engaphela noma inini, ngakho kubalulekile ukubhekisisa kahle lezi zinto zonke,” kusho uMakaab.
Amakhosi ayethembise ukuthi ngoJuni 15 azobe esemumemezelile umqeqeshi omusha. Nokho kuze kube yimanje lokhu akukenzeki njengoba iChiefs isize yaqala ukuziqeqesha ilungiselela isizini entsha. UMakaab uthe ukungabi namqeqeshi kwaBafana Bokuthula Noxolo yikona okwenze uJali waqoma iSundowns.
“Zimbili izinto ezenza uJali agcine kwiSundowns, okokuqala wukuthi iChiefs ayinaye umqeqeshi. UJali wathi akakwazi ukudlalela iqembu elingenaye umqeqeshi. Ngapha kwiSundowns, uPitso noJali bazana kudala besekwiBafana Bafana, ngakho wayevele eshilo ukuthi angakujabulela ukuphinde asebenze naye. Okwesibili wukuthi uJali ufuna ukudlala kwiCAF Champions League,” kuchaza uMakaab obegcizelela ukuthi akukho okunye ngaphandle kwalezi zizathu asezibalile.
UJali uzobanga ijezi kwiSundowns noHlompho Kekana, Tiyani Mabunda, Oupa Manyisa, Gaston Sirino noLucky Mohomi. Kulindeleke ukuthi uJali adlale okokuqala uma iSundowns isibhekene neChiefs emdlalweni wobungani obizwa ngeShell Helix Cup ngoJulayi 21. Akungabazeki ukuthi iChiefs izofuna ukungamniki thuba uJali kulo mdlalo.