Indodana ixabane nonina yazilengisa ethempelini
INGXABANO ebe phakathi kukanina nendodana ngempelasonto ngenxa yephathi ebeyisendaweni, iyona okusolwa ukuthi iholele ekuzilengiseni kwendodana ethempelini lamaNazaretha aseBuhleni, Impumelelo, eliseMpumelelo eFrance, eMgungundlovu, nokuyilapho umufi ebekhonza khona nomndeni.
Ngokuthola kweSolezwe ngomthombo ongaphakathi kuleli bandla ocele ukungadalulwa, uNduduzo Shezi (19) obefunda uGrade 10 eMzuzo High School kule ndawo, uqale wahilizisana nonina ngoba efuna ukuya ephathini ngenkani ebusuku.
“Emva kokuhilizana nonina, wagcina evumile (unina) ukuthi akaye ephathini nakuba kungokokuqala ukuthi aye ephathini,” kusho umthombo.
Ngokomthombo, uNduduzo wabuya ngo-11 ebusuku ngempelasonto baphinde bathusana nonina ngoba ebuze ukuthi kungani ebuya sekuhambe isikhathi ngalolu hlobo.
“Umfana wathi kunina akamshaye okungcono uma kungukuthi wenze into engafanele kunokuthi amthethise,” kubeka umthombo.
Kubikwa ukuthi entathakusa ngo-1 ngalolo suku, uNduduzo waphuma kubo, unina wazitshela ukuthi hleze usaphuthuma kubangani bakhe abekade ehambe nabo ukuya ephathini.
Umthombo uthi emva kwesikhathi esithile uNduduzo ehambile, abazali bakhe bathola imilayezo kumaselula abo evela kwindodana ivalelisa futhi ixolisa ngesenzo ehlose ukusenza (sokuzibulala) nakuba ingazange ichaze ukuthi ifuna ukwenzani.
Ngakusasa sekubonakala ukuthi indodana ayibuyi, umthombo uthi abazali bayo namalungu ebandla aphuma umkhankaso eyifuna.
“Kodwa kuye kwasishaqisa ukuthi agcine etholakele ethempelini, kubonakala intambo emqaleni eduzane nalapho eshonele khona,” kusho umthombo.
Uthe okuphinde kube yindida, akucaci kahle-hle ukuthi noma lona wesilisa uzilengisele esihlahleni esisethempelini, noma kukhona abambulele base bemthatha bezombeka
esihlahleni esisethempelini bemfake intambo emqaleni.
“Okuye kwasidida ukuthi ubenemihuzuko ebusweni, manje sixakwa wukuthi ubelimale kanjani ebusweni ebe ezilengisile,” ubuze kanje umthombo.
Okhulumela ibandla laseBuhleni, uMnuz Thokozani Mncwabe, uthe ubengakezwa ngalesi sigameko, nakuba enolwazi ngethempeli elikule ndawo.
“Siyazwelana kakhulu nomndeni ngokwenzekile,” kuchaza uMncwabe. Uthe njengebandla banenhlangano yentsha ebizwa ngokuthi INABACHU, lapho beyiyala khona ngezindlela zokuziphatha emakhaya nasebandleni.
Uthe ukuya emaphathini ngezinye zezinto abangazikhuthazi njengebandla ngoba akuthandazwa khona, kungenzeka uhlangabezane nezinkinga.
“Siphinde futhi sibe nenkonzo ka-23, 25 neka-14 lapho siyala khona bonke abesilisa nabesifazane ngendlela yokuziphatha,” kugcizelela uMncwabe.
Uthe njengoba sekwenzeke lesi sigameko nje, sekuzomele umndeni uligeze ngembuzi ithempeli.
“Okuzokwenzeka manje ukuthi sibikele inkosi, bese umndeni uthenga imbuzi okuzohlanzwa ngayo ithempeli. Umshumayeli okhona kuleli thempeli uyena okuzomele engamele lowo msebenzi,” kuchaza uMncwabe.
Okhulumela amaphoyisa KwaZulu-Natal, uColonel Thembeka Mbele, uthe bebengakezwa ngalolu daba.
Kuze kwashaya isikhathi sokushicilela ungatholakalanga umndeni kamufi ukuthi uphawule ngalolu daba. Kubikwe ukuthi umatasa njengoba ulungiselela umngcwabo wakhe.