I-CPS iphika izinsolo ezivela kwiBlackSash
ICASH Paymaster Services (CPS) iziphikile izinsolo zeBlackSash zokuthi ivimbela abaseposini ukuthi bashintshe amakhadi ezikhungweni zokuhola.
Esitatimendeni iCPS ithe iyazibona izinsolo ezibikwe enkantolo yomthethosisekelo zokuthi abasebenzi bayo bavimbela abakwaSassa nabaseposini ukuthi bakhiphe amakhadi amasha.
“Ngesikhathi abaseposini beqala uhlelo lokushintsha amakhadi kwakunezehlakalo zokuvinjwa kwabasebenzi balo ngoba sasingaqondi ukuthi bazokwenzani. Akuvunyelwa noma wubani esikhungweni ngoba kufanele siqinisekise ukuthi kuphephe abazohola nabasebenzi bethu. Umthetho uyasiphoqa ukuthi siqinise ezokuphepha,” kusho abakwaCPS.
Umqondisi weBlackSash, uNkk Lynette Maart, uthe iCPS iyaluphazamisa uhlelo lokukhishwa kwamakhadi amasha.
“AbakwaCPS bafuna ukuqhubeka nokuholela abantu yingakho bephazamisa uhlelo lokukhishwa kwamakhadi amasha akwaSassa. Sifuna ivumele abasebenzi baseposini nabakwaSassa ukuthi bashintshe amakhadi okuhola ukuze abantu abathola izibonelelo zikahulumeni bathole amakhadi amasha angeke abe nezindleko ezengeziwe,” kusho uNkk Maart.
Abakwa-CPS bathe bazoxoxa nazo zonke izinhlaka ezithintekayo kulolu daba ngoba abavimbeli muntu esikhungweni njengoba sebecaciselwe ngokwenzekayo.
Khonamanjalo, izolo uNkk Lindiwe Kwele obhekele ukusebenza kweposi, uthe sebekhiphe amakhadi amasha akwaSassa angaphezu kuka-1 million.
Ugqugquzele abantu ukuthi bayofaka izicelo zamakhadi amasha emaposini aseduze nabo ngoba amakhadi amadala azobe engasasebenzi ngoSepthemba 1.
“Kuthatha imizuzu emithathu ukuthola ikhadi lokuhola lakwaSassa elisha. Abantu kufanele babe sebenamakhadi amasha ungakapheli u-Agasti. Ikhadi elisha linombala oyigolide, libhalwe ukuthi SASSA ngakwesokunxele futhi ngeke libe nezindleko zikagesi, eze-airtime nezezikweletu,” kusho uNkk Kwele.
Uthe amakhadi amasha ayasebenza ezitolo ukuthi kuholwe ngawo noma kuthengwe impahla.
Ubadonse ngendlebe abantu ukuthi bangavumi ukushintshelwa amakhadi ngabantu abangabazi kodwa baye eposini nasezikhungweni zokuhola ukuze bathole ikhadi elisemthethweni.