Abe-IFP bakhuza okwenzeka KwaNongoma
ABESIFAZANE be-IFP eZululand bakhuza umhlola ngezigameko zokudlwengulwa kwezingane zamantombazane eziya ngokwanda ezindaweni zaKwaNongoma nezenziwa ngesihluku njengoba izisulu zidlwengulwa bese ziyabulawa.
USihlalo wabesifazane be-IFP eZululand, uNksz Nonkululeko Ndlela, uthe kungakapheli ngisho izinyanga ezimbili sekube nenqwaba yezigameko zokunukubezwa kwabesifazane abasebancane KwaNongoma.
Phakathi kwezigameko azibalwayo esokuthunjwa komfundi kaGrade 11 uThuleleni Zwane odlwengulwe maqede walengiswa esihlahleni. Umufi ungcwatshwe emasontweni amabili edlule.
Isigameko sakhe besilandela esentombazane eyadlwengulwa kuyo le ndawo maqede yahlohlwa induku esithweni sangasese.
Induku yaze yakhishwa esibhedlela kwagcina ngokuthi le ntombazane ishone.
Kumanje amaphoyisa aKwaNongoma amatasa athungatha umsolwa osagcwele amathafa.
Ngesonto eledlule inkantolo yeMantshi yaKwaNongoma igwebe owesilisa udilikajele neminyaka engu-42 ngaphezulu ebhadla ejele.
UKhumbulani Ndlovu (32) ulahlwe amacala okunukubeza abesifazane ababili ngokocansi ephindelela. Ugwetshwe ngoJuni 21. Yilezi zigameko ezisukumise abesifazane be-IFP abakhuza umhlola.
“Bakithi sithi sekwanele ngalokhu okwenzeka KwaNongoma. Zonke izinto ezimbi zokuhlukunyezwa kwabesifazane zenzeka khona. Okubi kakhulu babulawa ngesihluku uma sebedlwenguliwe. Sibona kuwubulwane obuphindiwe lobu esicela izwe lonke lisukume lithi sekwanele ngoba asikwazi ukuphila kanjena singabesifazane. Umuntu onjani ngempela onukubeza intombazane maqede ayibulale ngesihluku, ayilengise esihlahleni. Umuntu ononembeza onjani ngempela lona odlwengula ingane yentombazane bese eyijoja ngenduku esithweni sangasese? Impela kwanele manje akusukunywe kuliwe nalesi sihlava,” kusho uNksz Ndlela.
Uthe njengoba umsolwa owanukubeza umfundi kaGrade 11 ezobuyela enkantolo eyocela ibheyili ngomhla ka 27 Julayi, bafuna ukufaka ingcindezi yokuba anganikezwa ibheyili.
Umsolwa waboshwa ngemuva kwezinsukwana efike kubo kaThuleleni ebusuku.
Kuthiwa wafike washaya ifasitela watshela unina kamufi ukuthi uma engamkhiphi uzobulala yena.
Ngakusasa uThuleleni watholakala elengiswe esihlahleni edlwenguliwe.
Umsolwa waboshwa kodwa weqa ngosuku okwakufanele avele ngalo enkantolo.
Ugcine ebanjwe ebhace ezihlotsheni zakhe.
UNksz Ndlela uthe bahlela nokuvakashela imindeni yalezi zingane esezibulewe ukuze bahlanganise amakhanda nabazali bazo.