Isizwe sincoma impatho ‘kaNdlunkulu’
SIKHULU isililo emndenini nasemphakathini waKwaMpumuza eMgungundlovu emuva kokudlula “kukaNdlunkulu”, uNkk Thatheni MaNtombela Zondi (61), njengoba kuthiwa ubesafuna ukugeza igama lakhe ngamacala abebhekene nawo.
UMaNtombela ushone ngoMsombuluka esibhedlela saseGreys emuva kokugula isikhathi eside exinwe isifo somdlavuza webele.
Izolo Isolezwe lihambele umndeni nomphakathi wakule ndawo njengoba besemanzini.
Isililo besizwakala nxazonke njengoba abefundisi, umphakathi, abangani nezihlobo bebengena bededelana bezolila, bekhala ngokuthi kuwe umuthi omkhulu.
Umndeni kaMaNtombela uthe ukuxinwa kwakhe amacala okukhwabanisa u-R11 million
u-South African Revenue Services (SARS) ikhona ababona ukuthi kumdalele ingcindezi njengoba egcine edlulile emhlabeni.
Inkosi uNsikayezwe Zondi ekhuluma neSolezwe izolo emzini wakhe, uthe udaba lamacala ilona ebelimxine kakhulu.
“Bekumgqilaza kakhulu ukubhekana namacala. Uhlukumezeke kakhulu amaphoyisa embopha ngozankosi esibhedlela njengoba wayegula emva kokugwetshwa,” kusho iNkosi uZondi.
Indodana kaMaNtombela, uMnuz Thubelihle Zondi, ithe unina ubesafuna ukugeza igama lakhe.
“Okwenzeka ukuthi wayenomcwaningi mabhuku owayemenzela umsebenzi, wangawenza ngendlela kodwa icala lasala nomnikazi wenkampani. Kumanje ubesedlulisele icala ukuze azokwazi ukugeza igama lakhe njengoba ubengumuntu ohlonishwayo emphakathini,” kusho uThubelihle. Uthe unina wagcina ku-Grade 11 ukufunda kodwa ngenxa yokuhlakanipha ngokwemvelo nokwazi ibhizinisi inkampani yakhe, iThatheni Women’s Construction, ike yenza inzuzo ka-R160 million ngonyaka.
UThubelihle uthe kusukela abhekana namacala unina, eminyakeni eyisikhombisa edlule, ubengakwazi ukufaka isicelo semisebenzi kuhulumeni nokwenze kwaba nzinyana ebhizinisini lakhe.
UZondi uthe unina ubakhulise kahle nezingane zakubo oThobelani noNomathemba, wabenzela konke waphinde wabafundisa ibhizinisi njengoba bonke bezisebenza.
Inkosi uZondi eyashaywa isifo sohlangothi ngo-2014, ithe unkosikazi wayo uyena obemsiza waze walulama. Omakhelwane nabo bahambe amazwini enkosi ngoMaNtombela.
UMfundisi Bhekabantu Zondi uthe bafe olwembiza. “Ubeyikho konke emphakathini, uma kushoniwe elekelela, uma kuxakekiwe emasontweni enikela. Kuningi kakhulu akwenzele umphakathi,” kusho uZondi.
UMnuz Msawenkosi Dlamini usho okufanayo, encoma usizo lwakhe emphakathini. Undlunkulu wokuqala wenkosi, uNkk Thobi MaMbhele Zondi naye usho okufanayo ngomnakwabo, emncoma.
UMaNtombela uzofihlwa ngoMgqibelo Komkhulu Sports Ground khona KwaMpumuza ngo-9 ekuseni. Inkonzo yesikhumbuzo izoba ebandleni lakhe, ePresbyterian, eSweetwaters, ngo1.30 ntambama ngoLwesihlanu.