Izonwetshwa ngoR10.7bn eyakwaMercedes Benz
ZIHAMBA kahle izinhlelo zikaMengameli Cyril Ramaphosa zokufuna abatshalizimali emuva kokuthi iMercedes Benz imemezele ukuthi izonweba ifemu yayo ngo-600 Euros (R10.7 billion).
Lezi zindaba zimenyezelwe nguMnuz Markus Schafer izolo efemini yale nkampani ese-East London. USchafer uthe ukunwetshwa kwefemu kuza nendawo yokupenda izimoto entsha, indawo yokwenza umzimba wemoto, kuthuthukiswe indawo yokuhlanganisa imoto kwakhiwe nendawo yokupaka izimoto esezilindele ukuhamba.
“Isinqumo sethu sokwakha iC-Class e-East London sikhombisa ngokusobala ukuthi siyathanda ukutshala imali emnothweni waseNingizimu Afrika. Sifuna ukuvusa umnotho nokunika abantu impilo engcono,” kusho uSchafer.
URamaphosa ubashayele izandla abakwaMercedes ngokutshala u-R10.7 billion emnothweni waseNingizimu Afrika esho nokuthi le mali izosiza ukuthuthukisa umnotho nokudala amathuba omsebenzi.
“Siyabonga ukuthi nitshale imali emnothweni wethu ngoba kusho ukuthi sizokwazi ukungenisa u-R1.2 trillion esifuna ungene ezweni lethu. U-R10.7 billion wenu uzokwakha amathuba omsebenzi, unciphise negebe eliphakathi kwabampofu nabacebile. Siyathemba nabanye bazokwenza njengani batshale imali ukuze abantu abaswele umsebenzi baqashwe,” kusho uRamaphosa.
Uphinde waveza ukuthi yena nowayeyiPhini likaNgqongqoshe wezeziMali, uMnuz Mcebisi Jonas, bathole u-USD90 billion kubatshalizimali baphesheya kwezilwandle.
Isazi somnotho, uMnuz Dawie Roodt oyiChief Economist kwi-Efficient Group, sithe zihamba kahle izinhlelo zikaRamaphosa zokuheha abatshalizimali.
“Kubalulekile ukuthi abantu baqonde ukuthi iMercedes nezinye izinkampani ezikhiqiza izimoto zithola uxhaso uma zizotshala kuleli. Imali ezixhaswa ngayo ikhokhwa yithina bakhokhi bentela. Kuyinto enhle ukuthi iMercedes itshale imali ukuze idale amathuba omsebenzi,” kusho uRoodt.
Uthe uzomangala uma ezinye izinkampani zenza okwenziwa yiMercedes maduze ngoba kuthatha isikhathi ukuncenga abatshalizimali.
“Uhwebo luyashintsha e-United States ngakho iMercedes kungenzeka ihlukumezeke uma ithumela izimoto zayo kuleliya lizwe, asazi kuzokwenzekani. Ezinye izinkampani siyathemba zizolandela iMercedes kodwa angikuboni kwenzeka maduze lokho,” kusho uRoodt.