I-ANC ivikele isinqumo sayo ngoYengeni kolwenkohlakalo

I-ANC isivikele isinqumo sayo sokujuba uTony Yengeni ekutheni ahole ikomiti elibheka inkohlakalo nobugebengu njengoba bekunomhlangano wokubonisana ngomqulu le nhlangano ezokhankasa ngawo okhethweni lwangonyaka ozayo i-manifesto.

Lokhu kulandela abebenemibuzo ngokuthi le nhlangano iqoke umuntu owalahlwa amacala enkohlakalo ngo-2003 waze wabhadla ejele kodwa nguyena ohola ikomiti elilwa nenkohlakalo.

Le nhlangano ikhale ngenkohlakalo ethe isihlava okumele sikhucululwe.

UMnuz Jeff Radebe, inhloko yezemigomo ikhuluma nabezindaba kulo mhlangano ngoMsombuluko, uthe akuyona into engajwayelekile ukuthi kuqokwe umuntu oyilungu lesigungu esiphezulu ukuthi ahole ikomiti elithile.

“UYengeni uyisebenzele inhlangano, amalungu amthembile amkhethela esigungwini esiphezulu senhlangano. Wonke amalungu abekhethelwe ekubeni osihlalo njengoba bekunomhlangano wokubonisana ngomqulu wokhetho, angamalungu esigungu esiphezulu. Yebo watholakala enecala wadonsa isigwebo sakhe,” kusho uRadebe.

Abeyisishiyagalolunye amakomiti abebheka izinto ezehlukene okubalwa umhlaba, ezemfundo, ezempilo, ubugebengu nenkohlakalo nezinye izinto.

UYengeni wagwetshwa kulandela ukuhluleka ukudalula ukuthi wathola isaphulelo ngesikhathi ethenga iMercedes.

Amalungu e-ANC iwona avotela abantu abazongena esigungwini esiphezulu senhlangano.

Okhulumela i-ANC uMnuz Pule Mabe, uthe uYengeni wenza umsebenzi awuthunywe yinhlangano.