Udutshuliwe obehlasela izalukazi
AZIKATHOLAKALI izihlobo zowesilisa okuthiwa udutshulwe washona ngonogada ngoMsombuluko emuva kokuhlasela umuzi wesalukazi ezokweba eMhlali. Kuthiwa lo msolwa ubevele ehlupha ngokuhlasela izaguga kule ndawo njengoba esigamekweni sokugcina ebebamba inkunzi isalukazi esineminyaka engu-73.
Lo wesilisa imininingwane yakhe engakatholakali njengoba engaziwa, kuthiwa ubesenezinye izigameko abefunelwa zona ezihlobene nokuhlasela izaguga.
Kuthiwa isalukazi sivuswe umsindo ekuseni, okuthe uma siyobheka emnyango, umsolwa wasikhombisa isibhamu wafuna izimpahla.
Okhulumela amaphoyisa KwaZulu-Natal uLieutenantColonel Thulani Zwane uthe azikatholakali izihlobo zikamsolwa futhi akwaziwa nokuthi ubehlalaphi. Uveze ukuthi isalukazi besisalele emzini waso eSalt Rock ngesikhathi sivuswa umsindo egcekeni. Kuthiwa umsolwa ubesehambile endlini yesalukazi ngesikhathi ethungathwa onogada abazimele emuva kokubikelwa ngalesi sigameko.
UZwane uthe umsolwa ubesolwa ngamanye amacala amabili nawo ahlobene nokuphanga emizini ekuyona le ndawo.
“Umsolwa usabise isalukazi ngesibhamu maqede wathatha iselula, imali nezinye izimpahla. Isalukazi sishayele inkampani yonogada, yathungatha umsolwa obesaseduze nendawo yesigameko. Onogada bebezama ukumbamba, wadubula kuqala onogada baphindisela kwashona umsolwa,” kusho uZwane.
Umufi kuthiwa utholakale nesibhamu esingekho emthethweni okusolakala ukuthi yisona abekhombe ngaso isalukazi.
“Kuvulwe icala lokuphanga kuhlonyiwe, kwavulwa nedokodo lokufa komuntu eliphenywa amaphoyisa aseMhlali. Kusolwa ukuthi isibhamu esitholakale kumufi sasintshontshwe komunye umuzi ngesikhathi kuphangwa ngoMeyi nonyaka,” kusho uZwane.
UZwane uthe isalukazi asilimalanga kulesi sigameko ngoba umsolwa uphume nezimpahla kuphela.