Kuxwayiswa abadla amambawu

ISOUTH African Against Drunk Driving (Saad) idonse ngendlebe abantu ukuthi bayeke umkhuba wokuphuza utshwala bese beshayela izimoto ngoba izingozi eziningi zidalwa ngabantu abasuke bephuzile.

Esitatimendeni, iSaad ithe ukuphuza bese ushayela yicala elinzima okufanele olenzile avalelwe ejele.

Izolo bekugujwa usuku lokuqwashisa ngotshwala lapho abantu begqugquzelwa ukuthi bazithibe otshwaleni futhi bazifundise ngezinkinga ezenziwa wutshwala.

AbeSouth African Depression and Anxiety Group (Sadag) bakhumbuze abantu ukuthi akufanele baphuze baze babhuquze ngoba lokhu kuyicala. Uhulumeni uthe umuntu ozoshayela akufanele aphuze utshwala obudlula u-340ml ngosuku.

Lokhu kusho ukuthi owesifazane kufanele aphuze uhhafu wekhothi kabhiya ngosuku uma ezoshayela, owesilisa kufanele aphuze iziphuzo ezintathu ngosuku okusho ukuthi wo-340ml abathathu.

ISouth African Breweries (SAB) ithe abantu kufanele bazikalele njalo uma bephuza ngoba kufanele umuntu aphile nangakusasa.

Benze isibonelo sokuthi umuntu omdala onesisindo sika-68kg kufanele aphuze utshwala obungu-10ml ngehora.

“Imizimba yethu ikwazi ukumelana nesiphuzo esisodwa sotshwala ngehora. Uma unesisindo esincane kusho ukuthi umzimba wakho udinga isikhathi eside ukuthi ubhekane notshwala,” kusho abakwa-SAB.

ISadag icele abanenkinga yotshwala ukuthi bafonele u-0800 12 13 14 ukuze bathole usizo. Esitatimendeni iSadag ithe inombolo yabo ifonelwa amahora angu-24 ngosuku futhi usizo lwayo lumahhala. Lukhona nosizo olutholakala kwi-internet ngokungena kwiwebsite yeSadag ethi www.sadag.org.za bese ucindezela amagama athi CONTACT THE COUNSELLOR.

Bathe amakhansela abo akhuluma nabantu kwiinternet kusukela ngeMsombuluko kuya kwiSonto ngo-10 ekuseni kuze kube wu-2 ntambama.

Abantu abangenayo imali kodwa abadinga usizo kufanele bathumele isms ecela ukuthi bafonelwe ku-32312.