Isikole nohlelo lokucija abafundi
KUNESISHO sesiZulu esithi umuntu akalahlwa kanti abanye sebeyasijobelela bethi awukho umgqomo wokulahla umuntu.
Lesi sisho siqonde ukucacisa ukuthi noma umuntu angahluleka kanjani ukufeza iphupho lakhe kodwa uma kukhona abakholelwa kuye usuke esangazenza izimanga kudumale abesebelahle ithemba ngaye.
Yingakho namhlanje sinethulela isikole saseNquthu esikholelwa kulesi sisho, esesimangaze abaningi ngokuthatha abafundi abasuke sebechithwe kwezinye izikole ngenxa yokufeyila kwabo bese sibapheka sibenze lokhu obekungalindelekile kubo.
Lesi sikole iSpringlake High esiseHlathi Dam eduze nje komgwaqo ophuma eNquthu obheke eDundee okungu-R33.
Siphethwe uthishanhloko okunguNkk Dumisile Luvuno.
Siqala kwaGrade-8 kuya kwamatric.
UNkk Luvuno ngokubambisana nethimba lakhe aliholayo lo thisha, sebephendule lesi sikole umthombo wethemba kubazali nakubafundi abasuke sebechithwe kwezinye izikole.
Lesi senzo sokwamukela lonke uhlobo lo mfundi, siholele ekutheni amanye amabanga ahlukaniswe kabili ngenxa yobuningi bezingane.
Yize kunjalo kodwa igama lalesi sikole lisabalwa phambili nalezi ezibeke iNquthu neKwaZulu-Natal, ohlwini lwezikole ezenza kahle eNingizimu Afrika njengoba ngonyaka odlule sithole u-93% kwa-matric.
Empeleni sekuphele iminyaka engu-10 sithola imiphumela engaphezulu kuka-70%.
UNkk Luvuno echaza uthe abakubeki phambili ukuqhudelana nezinye izikole ngemiphumela kodwa okuphambili ukucija abafundi babo ngokwanele.
“Izikole eziningi azibemukeli abafundi abasuke befeyilile ngoba zisaba ukuthi bazolimaza izinga lokuphumelela kwabafundi bazo. Thina siyabathatha sibapheke bese kuphela unyaka sebehlukile kunalokho abebeyikho. Sibamukela ngoba sisuke sikholelwa ukuthi izingane awukwazi ukuzilahla noma uzixoshe uma zikhombisa uthando lokufunda nokuzithuthukisa. Bonke laba bafundi kuthi uma sebefika kwamatric bagila izimanga baphase kahle ngendlela eyisimanga,” kusho uNkk Luvuno.
Uthe isibalo sabafundi babo phambilini besimi ku-512 kodwa ngenxa yokwamukela laba abasuke bechithwe kwezinye izikole, banyuke bafinyelela ku-590.
Uqhube wathi abanye abafundi basuka ezindaweni ezikude bazoqasha eHlathi Dam ukuze bakwazi ukufunda eSpringlake.
“Othisha esinabo basebenze ngokuzikhandla ngoba ngamaholidi kaJuni/Julayi bahlukana phakathi kubekhona abafundisa ngesonto lokuqala kuvaliwe bese kwelilandelayo bayophumula kungene abanye. Thina lapha singabantu abahlale bephambili ngokwekhalenda yomnyango wezemfundo. Ukufundisa sikuqeda ngoJulayi kodwa ngokomnyango kumele sikuqede ngo-Okthoba. Ngaleso sikhathi thina sisuke sesibuyekeza umsebenzi wethu wonyaka siphinde sicwaninge ukuthi ngabe abafundi bethu basele kuphi nokuthi kwizivivinyo yikuphi lapho behluleke khona ukuze sibalekelele,” kuqhuba uNkk Luvuno.
Uveze nokuthi ngendlela abafundi babo asebebaningi ngayo, bagcine bevumelana nabazali ukuthi kube nomnikelo ka-R100 ngonyaka kumfundi ngamunye.
Uthe kule mali bakwazile ukuqasha othisha ababili ukuze balekelele kumabanga asephindeke kabili ngenxa yobuningi bezingane.
“Sikwenze lokhu ngoba umnyango uthe awukwazi ukusinikeza othisha kodwa ungakwenza lokho uma kunothisha ohambile noma oshonile. Bathi ukwengeza isibalo esinaso sabafundi akusahlangene nomnyango ngoba bona basebenze ngesibalo esimumatha isikole ngokusemthethweni. Yingakho sigcine sivumelana nabazali ukuba kukhishwe lo mnikelo ukuze sikwazi ukubhekana nezinye izidingo kanye nokuziqashela othisha abengeziwe. Sikwenze lokhu ngoba sibona ukuthi othisha esinabo sebebhekene nomsebenzi ongaphezulu kwamandla abo. Lokhu bekuzogcina sekubenza bangafundisi ngendlela,” kusho uNkk Luvuno.
Uveze nokuthi ukuzikhandla kwabo kudonse inhlangano kasomlando ongasekho waphesheya, uMnuz David Ratray.
Uthe le nhlangano ithathe abafundi abane yabaxhasa ngazo zonke izidingo zesikole nangokudla emakhaya ngoba bebeswele.
Uqhube wathi kumanje laba bafundi basezikhungweni zemfundo ephakeme bafundiswa isikhwama sikaRatray.
Ubuye wathi akubona kuphela laba bafundi abahlomula ngemifundaze kodwa kukhona nomunye oseCuba osezophothula izifundo zobudokotela, uMnuz Nkosinathi Nkabinde.
Uthe abanye bahlomula kakhulu kwimifundaze yomnyango wezemfundo.
UNkk Luvuno uthe okunye abakuqinisekisayo ukuthi abafundi abasuke bezithwele bayanikwa isikhathi sokufunda baze babelethe.
Uthe kwesinye isikhathi baxhumana nabazali babo ngemuva kokubeletha babacele ukuba bababhekele izingane ukuze babuye bezoqeda isikole.
Ubuye wabalisa ngokuthi abafundi abaphazamisekayo yilabo abaxinwa ukugula ngemuva kokubeletha nalabo abasuke bengenabo abantu emndenini abangabasiza babagadele izingane.
Lesi sikole sinesabelo mali sonyaka esingu-R457 445.
Kulesi sabelo kumele sisetshenziselwe ukuthenga izincwadi nezinye izidingo zesikole kodwa azeneli zonke.
Ngaphandle kwalokho ngonyaka odlule iSpringlake sithole amaBachelor angu-50% (abafundi abaye emanyuvesi), ama-diploma angu-32% namahigher certificate angu-17.65%.
Imiphumela yalesi sikole kule minyaka engu-11 ka-matric imi kanje: Ngo 2007 sathola u-78.10%, ngo-2008 u- 73.53% kwathi ngo-2009 sathola u-88%.
Ngo-2010 sithole u-84.93%, 2011 u-74.07%, 2012 u-79%, 2013 u-88.02 %, 2014 u-88.14%, 2015 u-87.13%, 2016 u-83.60% kwathi ngo-2017 sathola u-93%.