Kugujwe usomqulu wenkululeko
NJENGOBA izolo bekugujwa iminyaka engu-63 kwadwetshwa umqulu wenkululeko iFreedom Charter, uNgqongqoshe wezobuCiko namaSiko uMnuz Nathi Mthethwa, uthi likhulu ibanga eselihanjiwe ukuhlangabezana nemigomo yalo mqulu.
UMthethwa obekhuluma izolo eSandton, eGoli, uthe ziningi izinguquko ezenziwe njengokuthi baningi abesifazane ePhalamende, wathi izwe selingcono uma uqhathanisa no-1994.
Uthe baningi abantu abanezindlu, ugesi kanjalo namanzi.
“Odabeni lomhlaba okumanje lusematheni, uhulumeni usubuyisele umhlaba kubantu. Uhulumeni usukhokhe ngaphezulu kuka-R20 billion kubantu abangu-1.8 million abathole umhlaba. Sikhathazekile ngodaba lokuhamba kancane kokubuyisela umhlaba kubantu,” kusho uMthethwa.
Uthe yingakho i-ANC inqume ukuthi kumele lusheshiswe lolu hlelo lokubuyiswa komhlaba kubantu.
Usho lokhu nje i-EFF izolo ithe ihlale isebenzisa lo mqulu ukuze abantu bathole okubafanele ngoba ingcebo yezwe isezandleni zabambalwa.
Leli qembu likhale ngokuthi i-ANC iwulaxazile lo mqulu yavala umlomo abantu abawudweba.
“Ngemuva kweminyaka kwaba nokhetho lokuqala lwentando yeningi, umhlaba nengcebo yezwe kusezandleni zabantu abambalwa. Awukho umehluko otheni uma uqhathaniswa neminyaka engu-63 edlule,” kusho i-EFF. Okhulumela i-ANC uMnuz Pule Mabe, uthe bagubha le minyaka engu-63 yokudwetshwa kwalo mqulu okwenzeka kuhlangene abantu eKliptown ngo-1955.
Uthe amavolontiya okubalwa kuwo uMnuz Nelson Mandela noNkk Albertina Sisulu, bahambela izindawo ezehlukene beqoqa imibono yabantu ngezinto THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. ababezifuna.
“Uhulumeni wobandlululo wawazi ukuthi lo mkhankaso uzolimaza umbuso wawo yingakho kwaboshwa obhongoza balo mkhankaso. Kwathunyelwa amasosha namaphoyisa kwaboshwa abantu-156 ngamacala okuvukela umbuso.”
Uthe lo mqulu ukhuluma ngezinto eziningi okubalwa imfundo, izindlu, imisebenzi, umhlaba nezinye.
UMthethwa uthe avuliwe amathuba athinta umnotho kuleli, wathi amagugu ezokumbiwa angaphansi komhlaba alawulwa uhulumeni njengoba ewaphathele abantu.
Uthe miningi imithetho evikela abasebenzi kanjalo nekhuluma ngokulingana emsebenzini.
“Ezemfundo yiyona into uhulumeni ayibeke eqhulwini. Senza kahle ekuphasiseni abafundi kwa-matric. Uhulumeni ungenelelile njengoba ibiza imfundo ephakeme yingakho kunohlelo lokuthi kube nemfundo yamahhala,” kusho uMthethwa.
Uthe uhulumeni wakhe izindlu wathi lezi ngezinye zezinto abazenzile eziqukethwe kulo mqulu.