Amabhange azotakula uhulumeni
IZIKHULU zamabhange ezingamalungu eBanking Association of South Africa (Basa) zithi zizimisele ukutakula izinkampani zikahulumeni ezinenkinga yezimali ukuze zingacwili kakhulu ezikweletini.
Lesi simemezelo senziwe yisikhulu esiphezulu seBasa, uMnuz Cas Coovadia oveze ukuthi ngoLwesibili kaJuni 19 babenomhlangano noNgqongqoshe wezeziMali, uMnuz Nhlanhla Nene, owamaBhizinisi kaHulumeni uMnuz Pravin Gordhan nePhini likaNene, uMnuz Mondli Gungubele.
“Emhlanganweni sachazelwa ngesimo sezinkampani zikahulumeni nezingqinamba zezimali ezibhekene nazo. Sihambile sayokhuluma namalungu ethu siwachazela ukuthi uhulumeni udinga sisize izinkampani zakhe ukuze zikwazi ukukhokha izikweletu. Kuyoba yishwa uma lezi zinkampani zingase zeqiwe yizinyanga ezikweletini zazo. Amalungu ethu okungamabhange avumile ukusiza ngoba awafuni kube nabantu abaphelelwa wumsebenzi nokuthi umnotho wethu uwe,” kusho uCoovadia.
Uthembise ukuthi bengamabhange bazokwenza konke okusemandleni ukusiza izinkampani zikahulumeni ezifana ne-Eskom ukukhokha izikweletu zazo nokuthi zibuyelwe wuzinzo uma kukhulunywa ngokuphathwa kwezimali.
“Uhulumeni uvumile ukuthi uzozilalela iziphakamiso ezenziwayo zokuthi izinkampani zakhe zenze imali. Uphinde wazibophezela ukuthi uyena ozobhekana nesikweletu uma izinkampani zihluleka wukukhokha. Izingxoxo zethu nohulumeni ziyaqhubeka ngoba sifuna indlela yokuthuthukisa umnotho wezwe,” kusho uCoovadia.
Isazi somnotho nezomthetho, uSolwazi Bonke Dumisa, sithe kufanele ishayelwe izandla iBasa ngesimemezelo sayo yize simbaxambili.
“Isitatimende seBasa sihle uma kuwukuthi inkohlakalo efake izinkampani zikahulumeni kulesi simo esikuzo izokhucululwa ngoba abantu abadayisa amalahle kwa-Eskom bayawabizisa. Uthe isikhulu sakwa-Eskom uMnuz Phakamani Hadebe uyasithemba ngoba singumuntu owuhloniphayo umthetho kodwa akazi noma sizophumelela yini ukukhuculula inkohlakalo yeminyaka.
“Ukuze i-Eskom ikwazi ukusebenza kahle, yenze nemali ngathi kungaqalwa phansi kuqashwe kabusha izinkampani eziwudayisela amalahle. Ucwaningo luveza ukuthi kudala i-Eskom yayinezikhulu ezingu-81 kodwa manje zingaphezu kuka-500 ,” kusho uDumisa.
Uthe ngisho kwaSAA kunoSihlalo weBhodi othembekile futhi okwaziyo ukuvusa izinkampani eziwayo uMnuz Johannes Bhekumuzi Magwaza kodwa akazi ukuthi kuzomthatha iminyaka emingaki ukukhuculula inkohlakalo yeminyaka.