Kuxwayiswa abantu ngokudlanga kwesifo samarabi
UDOKOTELA wezilwane waseScottburgh KwaZuluNatal, uDkt Peter Biden, udonse ngendlebe abantu ukuthi basihlolele isifo samarabi emva kokufa kwezinja ezintathu.
UDkt Biden uthe ngoMeyi zintathu izinja aphoqeleke ukuthi azibulale ngenxa yamarabi.
Uthe amarabi yisifo esiyingozi esibulalayo uma singalashiwe ngakho kubalulekile ukuthi abantu, abasondelene nezinja abangazazi ukuthi ziyagonywa, balashelwe amarabi.
“Zijoviwe izinja ezintathu ezinamarabi zase zifa. Izidumbu zazo zithunyelwe elaboratory kahulumeni ebhekelele izilwane eseMgungundlovu lapho kuqinisekiswe khona ukuthi zinamarabi. Ngesikhathi zifika bekungabonakali ukuthi zinamarabi ngoba bezibukeka ziphethwe wubuthongo futhi zingafuni nokudla. Izinja eziphethwe amarabi zivamise ukuba nolaka,” kusho uBiden.
Uthe izinja ezimbili ezinamarabi zitholwe zintunta emgwaqeni zase zilethwa kuye kanti eyesithathu ibinomnikazi wayo kodwa wayiletha emtholampilo wezilwane ukuze ihlolwe.
“Amarabi yisifo esiyingozi esidinga ukuqashelwa ngoba kulula ukusigomela kodwa kunzima ukusilapha ngoba siyabulala. Siyacela abantu bazigome izinja zabo namakati ukuze baphephe kumarabi. Siyazigoma izinja namakati mahhala emtholampilo wethu oseScottburgh ngokubambisana nodokotela bezilwane bakahulumeni,” kusho uBiden.
Kulo nyaka kushone izingane ezimbili ngenxa yamarabi eyodwa yaklwejwa yikati enye yalunywa yinja eRichards Bay.
Ungqongqoshe woMnyango wezeLimo KwaZuluNatal, uMnuz Themba Mthembu, uthe basiqaphe ngeso lokhozi isifo samarabi, wacela abantu ukuthi bagome izinja namakati uma abasebenzi boMnyango bevakashele ezindaweni ezihlukene.
Abafisa ukwazi ukuthi izinja namakati kugonywa nini ezindaweni abahlala kuzo kufanele babuze amakhansela abo.