Halala kuSjava ophumelele eziqhenya ngobuyena
OSAZIWAYO baseNingizimu Afrika balokhu beqhubekile nokudlondlobala kwezokungcebeleka emhlabeni. Leli sonto livulwe ngezindaba ezimnandi zokunqoba komculi we-hip hop, uSjava indondo ye-Viewers’ Choice Best International Act kuma-BET Awards eLos Angeles, eMelika, ngeSonto.
Lo mculi odabuka eBergville uthathe amehlo omhlaba ngengoma yakhe ethi Seasons ayenze ngokubambisana noMozzy noReason eyenzela ifilimu yodumo, iBlack Panther, neyaphrojuswa nguKendrick Lamar.
Kulo mkhakha abeqokelwe kuwona uSjava uhlule abaculi baseNigeria, Ghana naseFrance abeqokwe nabo.
USjava, ogama lakhe lokuzalwa nguJabulani Hadebe, ufike endimeni yomculo kwezwakala ngealbhamu yakhe yokuqala Isina Muva ayikhipha ngo2016.
Le albhamu esidayise ngaphezulu kwe-Gold yashiya ngisho abaculi bamaskandi okubalwa kubo uKhuzani bevuma ushuni wakhe ngenxa yendlela acula ngayo.
USjava unenqwaba yabalandeli ngohlobo lomculo alwenzayo olubizwa nge-African Trap Music aqala ukuwupheka nozakwabo u-Emtee, uSaudi, nophrojusa wabo uRuff, bonke abangaphansi kwe-Ambitiouz Entertainment.
Lo mculi ushiye indima yokulingisa, ngemuva kokuvela emdlalweni okubalwa kuyo iGenerations, Zone 14, 7de Laan nakuGugu no-Andile.
Uzakhele udumo nogazi nangokuqhakambisa kwakhe amasiko abantu abamnyama baseNingizimu Afrika njengoba nakuwona lo mcimbi ebedlubhe izevatho zebandla lamaNazaretha futhi ehamba ngezinyawo.
USjava uthe uyathemba ukuthi ukuwina kwakhe kuzogqugquzela abantu abaningi bakhuthale babone ukuthi “ungaphumelela empilweni ngokuba uwena.”
Kwenzeka lokhu nje kuSjava, ngesonto eledlule kumenyezelwe ukuthi incwadi kasomahlaya uTrevor Noah, esihloko sithi Born A Crime isizofundwa kwezinye izikole zamabanga aphezulu eNewark naseNew Jersey eMelika njengengxenye yezincwadi ezifundwa ngabantwana esikoleni.
Le ncwadi esivele ibalwa nezithengwe kakhulu emhlabeni ishicilelwe ngonyaka odlule kanti ikhuluma ngempilo yakhe lo somahlaya.
Sithi halala Sjava, nawe Bergville awumncinyane.