ITheku lizophucula eyamatekisi
UMKHANDLU weTheku ubeke isabelomali sikaR202 million ukuze ukwazi ukuphucula imboni yamatekisi edolobheni.
Emhlanganweni wamakhansela alawula umkhandlu izolo, eCity Hall, kwethulwe isicelo sokuba kugunyazwe ukuthi umkhandlu ukhiphe le mali engenhla eyisabelomali seminyaka emithathu ngenhloso yokulekelela imboni yamatekisi.
Phambilini umkhandlu ububeke uR131 million ukuze uqhube lo msebenzi eminyakeni emithathu njengoba manje sekukhona izinto ezengeziwe ezenze ukuthi imali yenyuka yaba nguR202 million.
Lolu hlelo lomkhandlu lubhekelele izinto eziningi kubalwa ukuhlinzeka ngamakhono abashayeli nokunika imihlomulo labo abawenza kahle umsebenzi wabo.
Isicelo esethulwe izolo besiphinde sazise iziphathimandla ngokuthi uhlelo luqhubeka kanjani njengoba seluqalile.
USotshwebhu wamaKhansela e-ANC, uNkk Nelly Nyaniso, uthe imboni yamatekisi ibhizinisi elaqalwa ngabantu abamnyama, ngeke bahlale bangayilekeleli.
“Abantu abamnyama baziqalela leli bhizinisi ngezikhathi zobandlululo, kunzima namanje basayibambile, kumele siwuhulumeni sibasize ngayo yonke indlela ukuze siphucule ibhizinisi labo,” kusho uNkk Nyaniso. Ikhansela leDA, uMnuz Heinz de Boer, lixwayise ngokuthi iziphathimandla zikamasipala kumele zicophelele uma zikhuluma ngemboni yamatekisi ngoba osomatekisi abagayelwa mphako.” “Mama Meya, uyazi osomatekisi sebegasele kaningi lapha emhlanganweni bafika basivalele, ingakho ngithi kumele siqikelele uma senza izinto zabo,” kusho ude Boer.
Ikhansela le-ANC, uMnuz Mondli Mthembu, lithe yize udaba lwemboni lubucayi kodwa ngeke bahlale bangenzi lutho ukuzama ukukhuthaza osomatekisi.
“Lolu uhlelo olukahle oludinga ukubambisana ukuze luphumelele,” kusho uMthembu.
Osomatekisi abaphoqiwe ukuthi babambe iqhaza kulolu hlelo kodwa bangena ngokuzithandela.