Ucebisa imbokodo ngokupheka
IZINDLELA ezintsha zokupheka azisadingi ukuthi kuphele amahora umuntu eme emabhodweni. Lokhu kushiwo nguNkk Zanele van Zyl ongumpheki kwaSpekko, obehlomisa abesifazane ngamathiphu okupheka emcimbini weNtandokazi obuhlelwe yiSolezwe ngoMgqibelo.
UNkk Van Zyl uthe indlela abesifazane bamanje abangenaso ngayo isikhathi, sekumele lokhu kubhekelelwe ngisho besemabhodweni. Uthe usungakwazi ukuphekela umndeni wonke isidlo esiphelele ngaphansi kwemizuzu engu-20.
Uthe ukushisa u-anyanisi uma kuphekwa kuqeda umsoco. Uthe ngisho amafutha amaningi awasadingeki ekudleni.
“Angazi ukuthi uphumaphi lowo mqondo ngoba amafutha asisapheki neze ngawo, sesigcoba ibhodwe ukuze ukudla kunganamatheli. Ngisho u-anyanisi uyawushisisa nje kancane bese ufaka isishebo,” kuchaza uNkk Van Zyl.
Uxwayise nangomkhuba wokupheka inyama ebomvu ivuthwe kakhulu, athe iyadleka ingavuthiwe kodwa kumele ishintshe ummbala kuphela.
Ufundise nangezinhlobo ze-rice zakwaSpekko, athe iningi lazo linempilo. Uncome iBasmati rice athe ivuthwa emizuzwini emithathu. Uthe okuhle ngayo ukuthi inesigqi esiswini. Uveze ukuthi ama-rice akwaSpekko amaningi ngaweLow GI okusho ukuthi anempilo kanti kukhona ne-brown rice ayincoma kubantu abanesifo sikashukela. Ukhuze nomkhuba wokudla ebusuku, athe wenza ukuthi ukudla kungagayeki kahle esiswini.
UNkk Van Zyl ulinganise ngesidlo iBeef Stroganoff athe ungasidla ne-rice. Ukupheka lesi sidlo sekuhlangene ne-rice kungaphansi kwemizuzu engu-15 uma upheka ngeBasmati rice. Okudingayo:
Mushrooms, gherkins, BBQ spice, u-anyanisi, amafutha, izingcezu zenyama ebomvu, i-lemon juice, parsely, sour cream, usawoti no-pepper.