Uncoma insephe ngokusayina kwiChiefs
KUNCONYWA isinqumo sikaKhama Billiat sokujoyina iKaizer Chiefs njengesikhombisa ukuthi ayikapheli intshisekelo yokulambela izicoco kulo mdlali osuka kwiMamelodi Sundowns.
UFabian McCarthy owayeyibamba emuva esengumdlali, naye owasuka eChloorkop waya eNaturena wafika wawina izicoco, ubona iChiefs isayinise ukhilimu ongayisiza ibuyise udumo lwayo lwezicoco.
UBilliat ushiye iSundowns ngemuva kwamasizini amahlanu lapho enqobe nayo izicoco ezintathu ze-Absa Premiership, iCAF Champions League, iCaf Super Cup, iNedbank Cup neTelkom Knockout.
Ngakolunye uhlangothi, iChiefs isiqhube amasizini amathathu inganqobi lutho.
“UKhama ungumdlali osezingeni eliphezulu kodwa ngicabanga ukuthi iChiefs izodinga abanye abadlali abathathu noma abane abasezingeni lakhe ukuze yenze kahle.
“Ukusayina kwakhe kwiChiefs kungikhombisa ukuthi ungumdlali osalambele ukuphumelela njengoba eya eqenjini elifuna ukubuyela endleleni yalo yokunqoba izindebe. Ngiyakholwa wukuthi naye uzibona njengomdlali ongalisiza lenze lokho,” kusho uMcCarthy.
Uthe lokhu ukusho ngoba naye ngesikhathi esuka kumaBrazilians eya kuMakhosi wayengaphushwa imali. “Ngathatha isinqumo ngoba ngibona ukuthi kukhona engingafike ngikunike iqembu njengoba sakwazi ukuwina izicoco.”
IChiefs iphinde yasayinisa uLetlhogonolo Mirwa, oyibamba kwesokunxele emuva obedlala kwiBuya Msuthu ekwi-ABC Motsepe League, no-Andriamirado Andrianamiramanana waseMadagascar oyibamba maphakathi nenkundla.
“UMirwa ngike ngambona edlala kweyokuhlunga yeMotsepe, ungumdlali osemncane othembisayo. Konke kuzoncika kuyena ukuthi umelana kanjani nenselelo yokudlalela iqembu elikhulu. Uma ekwazi ukumela ushintsho azobhekana nalo, leli kuzotha yithuba lakhe lokuzibonakalisa. Umdlali waseMadagascar naye unenselelo efanayo yokuthi aziveze,” kusho uMcCarthy.
IChiefs ayigcinanga lapho, imemezele ukuthi isinike uVirgil Vries inkontileka yeminyaka emithathu. Kuthiwa uzovala isikhala esivuleke ngokushiya kukaBrilliant Khuzwayo osezoyibamba kwi-Orlando Pirates.
UVries utakulwa iChiefs nje uchithwe iBaroka abeyivimbela ngesizini edlule. Uke wayibamba kwiMaritzburg United nakwiLamontville Golden Arrows. Kula maqembu lo nozinti odabuka eNamibia ubebuye asolwe ngamaphutha amabi emapalini.
“Akekho umdlali ongalenzi iphutha ebholeni noma ngabe muhle kangakanani. UCristiano Ronaldo noLionel Messi sibabonile begeja amaphenathi kwiNdebe yoMhlaba. Okusemqoka wukuthi ufunde kulawo maphutha. Naye ngilindele ukuthi usefundile emaphutheni akhe. Okubalulekile wukuthi uza nesipiliyoni njengoba engunozinti weqembu lesizwe laseNamibia,” kusho uMcCarthy.
Uphethe ngokuthi ukholwa wukuthi iChiefs isimtholile umqeqeshi ingakho yenza lezi zimemezelo.
“Wukuthi nje akakasayini. Ngokubona kwami unalo ulwazi ngabadlali abamenyezelwayo,” kusho yena.