‘Abantu abazijwayeze umdlalo wezithuthuthu’
UMSHAYELI wezithuthuthu uSimphiwe “Piwe” Zulu uthi abantu abamnyama abayeke ubugwala, bazisondeze kulo mdlalo okusavame kuwo abamhlophe.
UZulu (33), uthe uyakuqonda ukuthi abantu abamnyama bathatha umdlalo wezithuthuthu njengonengozi kodwa kufanele bazisondeze kuwo ngoba nenkece etholakalayo iyaphilisa.
UZulu, wasePort Shepstone, eGamalakhe, uqale ngo-2011 ukugibela izithuthuthu, nakuba eqale ukungenela umjaho osemthethweni ngonyaka owedlule. Lezi akuzona izithuthuthu nje ezihamba emgwaqeni ohlelekile, kepha ilezo ezihamba ezintabeni.
“Abantu bakithi abayeke ubugwala bazosondeze kulo mdlalo. Ngiyazi ukuthi ubukeka uyingozi, nami ngangena ngesaba kodwa ngithe uma sengikuwo ngawubona ufana neminye,” kusho uZulu oshayelela iHerbalife Nutrition bLU cRU Yamaha.
Echaza ngokuthi wawuqala kanjani umdlalo ongandile kwabamnyama, uZulu uthe: “Ubaba wami wayeyiphoyisa eMlaza eminyakeni edlule. Wayenesithuthuthu ayesisebenzisa bese engigidla (amgibelise) kusona. Ngemva kweminyaka ngaqala ngaba nothando ngoba ngangizihlupha ngokwazi imidlalo nezithuthuthu ezehlukene. Kuthe ngo-2011 ngathenga isithuthuthu sami sokuqala iYamaha”.
Ngokusho kukaZulu umjaho wakhe wokuqala ubungonyaka owedlule ePort Elizabeth kwiNational Enduro kwiSilver Class. Uthe kulo mqhudelwano waphuma endaweni yesithupha.
“Ngasekupheleni kwenyanga ngizoba nomjaho omkhulu eDundee nawo okuzobe kungokazwelonke. Uzoqala ngoJuni 28 (kusasa) usongwe ngoJuni 30 (ngoMgqibelo). Isifiso sami esikhulu wukuthi eminyakeni ezayo ngibe sengidlala emiqhudelwaneni emikhulu yomhlaba, efana neDakar Rally,” kusho uZulu.
Njengakuyo yonke imidlalo, zikhona izingqinamba abashayeli bezithuthuthu ababhekana nazo.
“Kuyenzeka uvele ufelwe yisithuthuthu nje usezintabeni kudume ikhanda. Nokho ezikhathini eziningi akubi yizinto ezinkulu kuba nje izinto ezifana namaplaki, ezidinga izandla zakho nobuchopho. Ngamanye amazwi kufanele uphinde uphenduke umakhenika,” kuchaza uZulu.
Uthe uke wasebenza kwenye yezinkampani iMGM Holdings esebenza ngezomnotho ngokubambisa nosomabhizinisi.