Wemukelwe njengeqhawe uSjava
UTHEMBA ukuthi abantu bazogqugquzeleka ukuthi bangazuza noma ngabe yini abayifisayo umculi uSjava onqobe indondo yeViewers Choice Best International Act Award kumaBET Awards ngeSonto ebusuku, e-USA.
“Ngiyethemba ukuthi abantu bazogqugquzeleka ngokuthi ungaba nanoma ngabe yini ofisa ukuba yiyo uma ukholelwa osikweni lwakho nokukholelwa emsebenzini wakho. Ukuthi uqhamuka kuphi akusho lutho,” kusho uSjava otheleke eNingizimu Afrika izolo. Utshele Isolezwe ukuthi ubonga uyanconcoza kubantu abamvotelile ukuze athole lo mklomelo ngoba ngaphandle kwabo ubengeke aze afinyelele lapho ekhona. Uthe kuzocaca namuhla ukuthi bazomisa kanjani ngemicimbi yokujabula nabalandeli ngoba ubesanda kufika engakabi nazo izinhlelo ezitheni. USjava, obekuzwakala ukuthi kunomsindo lapho ekhona, uthe unina ujabule ngendlela eyisimanga ngokunqoba kwakhe.
Ubengomunye wabebeyomhlangabeza esikhumulweni sezindiza i-O.R Tambo International Airport, Ekurhuleni.
Lo mculi uhlangatshezwe njengeqhawe njengoba bekugcwele futhi kuqhume imikikizo namakhwela ngesikhathi eqhamuka.
Abantu bebephethe amabhodi anezithombe zakhe futhi kukhona nabaphethe amabhalunde othi uma uwahlanganisa akhiphe igama lakhe.
Uphume ezifakele amathreksudi, egaxe ubhakha futhi efake ikama ekhanda.
USjava uhalaliselwe nxa zonke ngokunqoba kwakhe lo mklomelo nangokukhuluma kwakhe IsiZulu ngesikhathi ethula inkulumo yokuyamukela. Emcimbini ubedlubhe izivatho ezigqokwa kakhulu kwaShembe.